Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ սկսվում է Սեդա Քոչարյանի գործի դատավարությունը:
Դիլիջանի 50-ամյա բնակչուհի Սեդա Քոչարյանը 2008-2013 թվականներին Աննա Ա.-ին դրդել, համոզել է տարբեր անձանցից և կազմակերպություններից պարտքով գումարներ վերցնել ու տալ իրեն:
Հետագայում, ըստ առաջադրված մեղադրանքի, Սեդան հրաժարվել է գումարները վերադարձնելուց՝ սպառնալով վնասել Աննային ու նրա ընտանիքի անդամներին:
Աննան կատարվածի պատճառով 2013 թվականի հունվարի 8-ին, ժամը 17-ի սահմաններում Դիլիջանի Մյասնիկյան փողոցում գտնվող քաղաքային գերեզմանատանը ծառից պարանով կախվելու միջոցով ինքնասպան է եղել:
Բացի դրանից, առաջադրված մեղադրանքի համաձայն՝ Սեդա Քոչարյանը 2012 թվականի մարտից մինչև սեպտեմբեր խարդախությամբ՝ Աննա Ա.-ի վստահությունը չարաշահելով ու խաբեությամբ Արարատ Ա.-ից հափշտակել է 2 միլիոն դրամ գումար:
Սեդա Քոչարյանին մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ կետով: Նրա խափանման միջոցը ստորագրությունն է չհեռանալու մասին:
