Շինեյդ Օ’Քոննորի և Մայլի Սայրուսի հակամարտությունը նոր թափ է հավաքոմ: Իռլանդացի երգչուհին, ում վիրավորել էր երիտասարդ փոփ-աստղի արտահայտությունները, իր պաշտոնական կայքում չորրորդ բաց նամակն է հրապարակել այն մասին, թե ինչպես է փոխվել իր կյանքը գործընկերուհու գործողություններից հետո:
«Ձեր արարքի արդյունքը դարձան մարդկանցից եկող բազմաթիվ նամակները, որոնք դրդում են ինձ ինքնասպանության: Չասեմ արդեն այն մասին, որ ես դարձել եմ հազարավոր վիրավորական հոդվածների ու մեկնաբանությունների հերոսուհի»,- գրել է Օ’Քոննորը:
Չնայած երգչուհու կյանքում վերջին ժամանակներս առկա բացասական երևույթներին՝ նա չի հանձնվում: «Բարեբախտաբար, ես ուժեղ մարդ եմ: Ես չորս երեխա ունեմ, որոնց կյանքը կործանված կլիներ, եթե ես լսեի այդ մարդկանց խորհուրդները: Եթե ես երեխաներ չունենայի, երևի թե այդ հաղորդագրությունները, հոդվածները և նամակները հասնեին ցանկալի արդյունքին»,- հավելել է նա:
Հիշեցնենք, որ աստղերի միջև հակասությունը սկսվել էր այն բանից հետո, երբ Սայրուսը հարցազրույցներից մեկում պատմել էր, որ Wrecking Ball տեսահոլովակում ինքը ոգեշնչվել է 1990-ին Շինեյդի Nothing Compares 2 U տեսահոլովակից: Այդ լուրը ոչ միայն չի ուրախացրել իռլանդուհուն, այլ ընդհակառակը՝ վրդովեցրել է: Երգչուհին չի լռել, այլ համացանցում նամակ է տեղադրել, որն էլ սկիզբ է դրել նրանց միջև «պատերազմին»:
