Հունիսի 4-ին կայանալիք «Եվրո-2012»-ի ընտրական փուլի Ռուսաստան-Հայաստան հանդիպման նախօրեին խաղի մասին իրենց կարծիքներն արտահայտեցին նաև քաղաքական գործիչները: «Առաջին լրատվական»-ի անցկացրած հարցման մասնակիցներից միայն ԱԺ ՀՅԴ խմբակցության ղեկավար Վահան Հովհաննիսյանին չէր հետաքրքրում այդ հանդիպումը:
ԱԺ ԲՀԿ խմբակցության ղեկավար Արամ Սաֆարյան. «Մենք պիտի խաղանք ու լավ խաղանք. պատվի հարց է: Մեր այս հավաքականը վերջին տարիների ամենաուժեղ կազմն ունի: Հարկավոր է մինչև վերջ տրվել խաղին և ամեն ինչ լավ կլինի: Կանխատեսումներ չեմ անում»:
ԱԺ ՀՅԴ խմբակցության ղեկավար Վահան Հովհաննիսյան. «Անգամ տեղյակ չէի, որ վաղը նման հանդիպում է լինելու: Ինձ չի հետաքրքրում»:
ԱԺ ՀՀԿ պատգամավոր Հովհաննես Սահակյան. «Ինչպես յուրաքանչյուր հայրենասեր մարդ երկրպագելու եմ մեր հավաքականին: Մենք Սանկտ Պետերբուրգից հաղթանակով ենք վերադառնալու: Հայաստանը հաղթելու է 2:1 հաշվով»:
ՀԱԿ ներկայացուցիչ Դավիթ Շահնազարյան. «Շատ եմ ցանկանում, որ հաղթենք: Անկախ բոլոր կանխատեսումներից հավատում եմ, որ կհաղթենք: Լավ կլիներ խոշոր հաշվով (ժպտում է): Պատմության մեջ առաջին անգամ է, որ իրական հնարավորություն ունենք խմբից դուրս գալու և պետք է օգտագործենք այդ հնարավորությունը»:
Ժառանգություն կուսակցության վարչության անդամ Դավիթ Սանասարյան. «Հուսով եմ, որ չի գործի հայ-ռուսական բարեկամության գործոնն ու արդար խաղի ականատես կլինենք: Գիտակցում եմ, որ մրցակիցն ուժեղ է, սակայն կամք դրսևորելու դեպքում կարող ենք հաղթել: Կարծում եմ՝ լավ խաղ ցուցադրելու պարագայում մեր հավաքականը կհաղթի 1:0 հաշվով»:
