ԱԺ «Ծառուկյան» խմբակցության քարտուղար Վահե Էնֆիաջյանը վաղ է համարում 2018թ-ի վարչապետի թեկնածուի հետ կապված հարցի հրապարակային քննարկումը: «Առաջին լրատվական»-ի հետ զրույցում նա նշեց, որ ամեն ինչի մասին խմբակցությունում խոսում են, քննարկում են, բայց հրապարակավ հայտարարություն դեռ չեն կատարում: Անդրադառնալով հարցին, եթե ՀՀԿ-ն առաջադրի Սերժ Սարգսյանի թեկնածությունը վարչապետի պաշտոնում և Սերժ Սարգսյանն էլ խոստանա, որ «Ծառուկյան» դաշինքի, Ծառուկյանի կողմից գրված կետերը կիրագործի, ապա կսատարեն նրա թեկնածությունը, Վահե Էնֆիաջյանն ասաց.
«Ամեն ինչ իր տրամադրվածությունն ու իր ժամանակն ունի, երբ որ կհասունանա այն ժամանակահատվածը, երբ որ պետք է «Ծառուկյան» խմբակցությունը և ԲՀԿ-ն իր դիրքորոշումը հայտնեն, մենք մեր կարծիքը կհայտնենք մեր ժողովրդին: Մեր ծրագրային դրույթներն ու մետեցումները մեր հասարակության համար ընդունելի և ընկալելի են եղել, մի քանի հարյուր հազար ՀՀ քաղաքացի մեր ծրագրային դրույթներին իր հավանությունն է տվել»:
Անդրադառնալով դիտարկմանը, թե արտախորհրդարանական ուժերից արդեն տեսակետներ են հնչում, որ պետք է օրակարգ ձևավորել և պայքարել Սերժ Սարգսյանի վարչապետ դառնալու դեմ, Վահե Էնֆիաջյանն ասաց. «Մենք լսում ենք նրանց կարծիքը, ի գիտություն՝ ընդունում ենք, շարժվում ենք առաջ: Մեր դիրքորոշման մասին ճիշտ ժամանակին կներկայացնենք»:
Մանրամասները՝ տեսանյութում։
