Վաղը ֆուտբոլի Հայաստանի ազգային հավաքականը աշխարհի առաջնության ընտրական փուլի 7-րդ հանդիպումը կանցկացնի Բուխարեստում՝ մրցելով Ռումինիայի ընտրանու հետ:
Ինչպես նախորդ հանդիպումներին, այս անգամ ևս մեր հավաքականը կորուստներ ունի: Դարպասապահի խնդիրը մի կողմ դնելով՝ նշենք, որ վնասվածքի պատճառով առաջիկա հանդիպմանը չեն մասնակցի պաշտպան Հրայր Մկոյանը, հարձակվող Էդգար Մանուչարյանը, ինչպես նաև Գևորգ Ղազարյանը, ով մարտի 26-ին Երևանում կայացած Ղազախստանի հետ հանդիպման ժամանակ ստացած ծանր վնասվածքից հետո միայն վերջերս է սկսել գնդակով մարզվել: Ռումինիայի հետ հանդիպումը բաց կթողնի նաև կիսապաշտպան Արտակ Գրիգորյանը, ով որակազրկված է:
Այս օրերին ֆուտբոլասերների շրջանում քննարկվող գլխավոր թեմաներից են Հայաստանի ազգային հավաքականի հնարավոր մարտավարությունն ու մեկնարկային կազմը Ռումինիայի հետ մրցավեճում: Պարտության դեպքում կողմերից մեկը կզրկվի աշխարհի առաջնության ընտրական փուլի համար պայքարելու հնարավորությունից: Ուստի թե՛ հայերը և թե՛ ռումինացիները ստիպված են լինելու վաղը հարձակողական ոճով խաղալ:
Բնական է, որ դաշտի տիրոջ կարգավիճակով ռումինացիները խաղալու են առաջին համարով և նրանց դեմ պայքարել, ասենք, 4-3-3 մարտավարությամբ, կարծում ենք, անմտություն կլինի: Հաշվի առնելով մեր հավաքականի պոտենցիալը՝ կարծում ենք, որ Ռումինիայի դեմ օպտիմալ մարտավարությունը 4-3-2-1-ն է:
Ըստ «Առաջին լրատվական»-ի՝ խաղային այս ֆորմատում Հայաստանի ազգային հավաքականի մեկնարկային կազմում կարող են լինել հետևյալ ֆուտբոլիստները: Դարպասում՝ բնականաբար Գրիգոր Մելիքսեթյանը, ով ազգային թիմի ճամբարում գտնվող դարպասապահներից ամենափորձառուն է և որակներով գերազանցում է հատկապես Բեգլարյան Արսենին:
Պաշտպանության օղակում լավագույն լուծումը կլինի կենտրոնական գոտում Վարազդատ Հարոյանին և Գայել Անդոնյանին օգտագործելը: Երևանում կայացած Ղազախստանի դեմ մրցավեճում պաշտպանության աջ եզրում խաղաց Տարոն Ոսկանյանը և լավ տպավորություն թողեց: Հետևաբար Ռումինիայի դեմ ևս Ոսկանյանը կարող է լինել պաշտպանության աջ եզրում: Ձախ եզրում տեսնում ենք Հովհաննես Համբարձումյանին, ով վնասվածքից հետո բավարար մարզավիճակում է գտնվում:
Հենակետային գոտում Հենրիխ Մխիթարյանի կողքին կարող է խաղալ Գոռ Մալաքյանը, ով կարողանում է գնդակ պահել և օժտված է դաշտը տեսնելու ունակությամբ: Շատերը Մխիթարյանի կողքին՝ հենակետային գոտում, տեսնում են Դավիթ Մանոյանին: Վերջինը ևս տեխնիկապես լավ է պատրաստված, գրագետ է, բայց վնասվածքից հետո ընդամենը մեկ երկու հանդիպման է մասնակցել:
Կիսապաշտպանության կենտրոնում կամ ենթահարձակվողի դիրքում Մարկոս Պիզելին, կարծում ենք, այընտրանք չունի: Կիսապաշտպանության ձախ եզրում, կարծում ենք, արդյունավետ կարող է գործել Տիգրան Բարսեղյանը, ով լավ մարզավիճակում է գտնվում և իր թիմի՝ «Վարդարի» կազմում վերջին շրջանում գոլեր է խփում: Աջ եզրում հավանաբար կտեսնենք Կամո Հովհաննիսյանին, քանզի Արաս Օզբիլիսը կրկին ֆունկցիոնալ պատրաստվածության և մարզավիճակի հետ կապված խնդիր ունի: Ամեն դեպքում, կարծում ենք, Օզբիլիսին վաղը խաղադաշտում անպայման կտեսնենք:
Որպես նոմինալ՝ կենտրոնական հարձակվող լավագույն տարբերակը մեկնարկային կազմում Ռուսլան Կորյանին ասպարեզ դուրս բերելն է: Փորձը ցույց է տվել, որ Արթուր Սարկիսովը, Հայաստանի ազգային հավաքականի մեկնարկային կազմում խաղալով, արդյունավետությամբ չի փայլում: Ինչ վերաբերում է Սարգիս Ադամյանին, ապա 2-րդ Բունդեսլիգայում ելույթ ունեցող այս ֆուտբոլիստը տևական ժամանակ չի խաղացել Հայաստանի հավաքականում, և կարևորագույն այս խաղում նրան մեկնարկային կազմում վսատահելն այնքան էլ ճիշտ չի լինի:
Նշենք նաև, որ այսօր հավաքականում կան մի քանի ֆուտբոլիստներ, ովքեր կարող են վաղը օգտակար լինել: Խոսքը Մանոյանի, «Ալաշկերտի» ներկայացուցիչներ՝ կիսապաշտպան Արտակ Եդիգարյանի և պաշտպան Գագիկ Դաղբաշյանի մասին է, ովքեր լավ մարզավիճակում են գտնվում:
Հիշեցնենք, որ Ռումինիա-Հայաստան հանդիպումը կկայանա «Նացիոնալ արենայում» և կսկսվի Երևանի ժամանակով 22:45-ին:
