Պաշտոնական Թբիլիսին չի ժխտում, որ շարունակում է ամրապնդել երկրի պաշտպանունակությունը սահմանները պաշտպանելու և անվտանգությունն ապահովելու համար. ինչպես փոխանցում է Грузия Online-ը, նախօրերին հայտնել է Վրաստանի արտաքին գործերի փոխնախարար Նինո Կալանդաձեն՝ մեկնաբանելով Ցխինվալի իշխանությունների ներկայացուցիչ Ալան Պլիևի արած հայտարարությունն այն մասին, թե «Իսրայելը պատրաստ է «Մերկավա-4» նորագույն տանկերի խմբաքանակ ուղարկել Վրաստան»: Պլիևը պնդել Է, որ Թբիլիսին շարունակում Է մեծացնել ռազմական հզորությունը: Նրա խոսքով, դա վկայում է այն մասին, որ Վրաստանի ղեկավարությունը մտադիր է հարցը լուծել ռազմական ճանապարհով: «Վրաստանը երբեք չի պատրաստվել հարձակվել որևէ մեկի վրա, մանավանդ՝ սեփական տարածքում և սեփական բնակչության վրա»,- ասել է փոխնախարարը և հավելել, որ Վրաստանը շարունակում է ամրապնդել բանակը սեփական անվտանգության նպատակով: «Ոչ ոքի համար գաղտնիք չէ, որ Վրաստանը շարունակում է զինվել իր հնարավորությունների շրջանակներում, քանի որ նրա սահմանները պաշտպանված չեն, և անվտանգությունն ապահովված չէ, ինչը ցույց տվեց 2008 թ. օգոստոսը»,- ընդգծել Է Կալանդաձեն: