«Ռուսաստանում չգիտեմ ինչ կարող է լինել, բայց Հայաստանի Հանրապետության Արագածոտնի մարզի Շամիրամ համայնքում ոչ մի վենդետա էլ հնարավոր չէ: Շամիրամ համայնքում այդպիսի մարդ չի ապրում, որ ունակ է վենդետա իրականացնելու»,- «Առաջին լրատվական»-ի հետ զրույցում ասաց Շամիրամի համայնքապետ Մուրազ Բրոյանը՝ անդրադառնալով օգոստոսի 4-ին հնչած կրակոցներին և երեկ արդեն կրակոցներն արձակելու մեջ մեղադրվող Թելման Քալաշյանի ձերբակալությանը:
Հիշեցնենք, որ երեկ Արմավիրում հայտնաբերվել է Արագածոտնի մարզի Շամիրամ գյուղում 4 անձի սպանության կասկածանքով հետախուզվող Թելման Քալաշյանը:
Շամիրամի համայնքապետը մեզ հետ զրույցում ասաց, որ ինքը բազմիցս խոսել է համայնքի բնակիչների հետ, հորդորել է վերջ դնել կատարվածին: «Հավատացնում եմ՝ այդ դեպքը շարունակություն չի ունենա: Կրակողը բռնված է, 4 հոգի մահացած են, 8-ն էլ՝ վիրավոր: Հիմա էլ ի՞նչ կարելի է փոխել»,- հավելեց Բրոյանը:
Եզդի համայնքի ներկայացուցիչ Ազիզ Թամոյանը ևս «Առաջին լրատվական»-ի հետ զրույցում ասաց, որ նախօրեին իրենց ազգային տոնի ժամանակ ևս մեկ անգամ հորդորել է վերջ դնել կատարվածին, շարունակություն չտալ և թողնել, որ իրավապահները զբաղվեն դեպքով, իսկ դատարանն էլ արդարադատություն սահմանի:
«Ես նորից խոսեցի, կոչ արեցի մեր ժողովրդին հանդարտվել: Ամեն ինչի համար պատասխանատուներ կան, և իրենք կորոշեն՝ ինչպես վարվել»,- ասաց Թամոյանը՝ հավելելով. «Էդ որ մամուլը գրում է՝ վենդետա է լինելու, չգիտեմ՝ ինչ է լինելու, չկա այդպիսի բան: Մեր ժողովուրդը հանգիստ ժողովուրդ է: Հիմա էդ դեպքն էլ փողի համար եղավ: Պարտք էին եղել, չէին տվել, նա էլ գնաց այդ արարքին: Հիմա բռնել են և իր արարքի համապատասխան կպատժեն»,- հավելեց Թամոյանը:
Թամոյանը նաև նշեց, որ իր ազգականները, ովքեր վիրավորվել էին դեպքի ժամանակ, արդեն ապաքինվել են և դուրս են գրվել հիվանդանոցից:
Հիշեցնենք, որ Թելման Քալաշյանը օգոստոսի 4-ին զենքով մտել էր Շամիրամ համայնքի գերեզմանատան հարակից տարածք, որտեղ արարողություն էր կազմակերպվել, և կրակոցներ էր արձակել, ինչի հետևանքով 4 անձ մահացել էր, իսկ յոթը՝ վիրավորվել: Թելման Քալաշյանը դեպքի վայրից դիմել էր փախուստի: Նրան ՀՀ քրեական օրենսգրքի 104-րդ հոդվածի 2-րդ մասի 1-ին և 6-րդ կետերով, 235-րդ հոդվածի 1-ին մասով և 34-104-րդ հոդվածի 1-ին մասով որպես մեղադրյալ ներգրավելու մասին որոշում էր կայացվել, և հայտարարվել է հետախուզում: Դեպքից մեկ օր անց ձերբակալվել էր Քալաշյանի հորեղբայրը ՝ հանցագործությունը պարտակելու կասկածանքով:
