Այսօր լրագրողների հետ ճեպազրույցի ժամանակ ՀՀ գյուղատնտեսության նախարար Սերգո Կարապետյանը նշեց, որ գյուղատնտեսության ոլորտում բարեփոխումների ընթացքը գոհ լինելու հիմք տալիս է։ «Ինձ, իհարկե, այնքան էլ չի գոհացնում, որովհետև ուզում եմ, որ ավելի արագ կատարվի այդ գործընթացը, իմ բնավորությամբ ես այդպիսին եմ։ Բայց գործընթացը սկսվել է, իսկ գյուղատնտեսության ոլորտում արդյունքները կես տարում կամ մեկ տարում չի կարելի նկատել, որովհետև, օրինակ, ծառը որ տնկում ես, բերքը մի քանի տարի հետո ես ստանալու»,- ասաց Ս. Կարապետյանը։
Նրա խոսքով՝ բարեփոխումները կազդեն նաև գյուղմթերքի գների վրա։ «Առաջիկայում շուկայում բաց գրունտի բանջարեղենը կմտնի, ամսվա վերջում աստիճանաբար ծիրանը կհասունանա, կմտնի շուկա, բալը արդեն մտել է, ելակի գները արդեն միանգամից ընկել են։ Կարտոֆիլն ու մնացած բանջարեղենն էլ շուտով շուկայում բավարար քանակությամբ կլինեն, և գները կիջնեն»,- ասաց նախարարը։
