Թուրքիայի ժողովրդավարացման միջոցառումների փաթեթը ԵՄ-ի պահանջով չի ընդունվել, հայտարարել է Թուրքիայի աշխատանքի և սոցիալական զարգացման նախարար Ֆարուկ Չելիկը: Հինգշաբթի օրն այս մասին տեղեկացրել է «Անադոլու» գործակալությունը:
Չելիկի խոսքերով՝ ժողովրդավարացման միջոցառումների փաթեթն ընդունվել է Թուրքիայի պահանջներից ելնելով: Նա նշել է նաև, որ ընդունված որոշումը կապահովի երկրի զարգացումը:
Սեպտեմբերի 30-ին Թուրքիայի վարչապետ Էրդողանը հայտարարել էր երկրի ժողովրդավարացման միջոցառումների նոր փաթեթի ընդունման մասին:
Այդ փաթեթի համաձայն՝ բոլոր քաղաքական կուսակցությունները կղեկավարվեն երկու առաջնորդների կողմից:
Բացի այդ, նախընտրական քարոզարշավի ժամանակ կուսակցությունները թուրքերենից բացի, կարող են ընտրել նաև այն լեզուները, որոնցով խոսում են երկրի տարածքում:
Ինչպես նաև ազգային ատելության հողի վրա կատարված հանցագործությունների համար սահմանված ազատազրկման ժամկետը կավելացվի երեք տարով, նշվում է փաթեթում:
Այս փաթեթը նախատեսում է նաև չեղյալ համարել հիջաբի կրման արգելքը պետական կառույցներում, բացի Զինված ուժերից:
Փաթեթը երկրի ընդդիմության կողմից միանշանակ չի ընդունվել:
Հինգշաբթի օրը Թուրքիայի ԱԳ նախարար Ահմեդ Դավութօղլուն երկրի ընդդիմությանը կոչ է արել ժողովրդավարացման միջոցառումների փաթեթն իրականացնելու հարցում համագործակցել իշխանությունների հետ:
