Ադրբեջանական APA լրատվական գործակալության փոխանցմամբ, թուրքական ROKETSAN ընկերությունը ձեռնամուխ է եղել Ադրբեջանի զինված ուժերից ստացված պատվերների իրականացմանը։ Այս մասին հայտարարել է ընկերության գլխավոր տնօրեն Հուսեյին Բայսաքը։
Վերջինիս խոսքերով, իրենց հրթիռների առաջին խմբաքանակն Ադրբեջանը կստանա 2011 թվականի վերջին կամ 2012 թվականի սկզբին։ Խոսքը 107 և 120 միլիմետրանոց հրթիռների մասին է, որոնց հեռահարությունն ավելացված է։
Բայսաքը նշել է, որ Թուրքիայի ռազմական արդյունաբերության նախարարությունն Ադրբեջանի համար արտադրելու է «Սաքարիայի» նման հրթիռային արձակման սարքեր։
Հիշեցնենք, որ նախորդ տարի հրթիռների և ռեակտիվ զինամթերքի արտադրության ոլորտում Թուրքիայում առաջատար ROKETSAN ընկերությունն Ադրբեջանին հատկացրել է 244 միլիոն դոլարի արտադրանք:
