Երեկվա ընթացքում երկու անգամ՝ խորհրդարանում ունեցած ելույթի և երեկոյան Անկարայի «Էսենբողա» օդանավակայանում կայացած մամուլի ասուլիսի ժամանակ, Թուրքիայի նախագահ Ռեջեփ Թայիփ Էրդողանը հայտարարել է, որ Ռուսաստանի հետ արդեն կնքվել են ռուսաստանյան արտադրության S-400 տիպի հակաօդային համակարգերի ձեռք բերման պայմանագրերը: Ռուսական մամուլն, իհարկե, շտապել է տեղեկացնել, որ փաստաթուղթն առայժմ չի ստորագրվել, և գործարքի հավանական ժամկետ է նշել 2017-ի ավարտը:
Կիրակի օրը Միացյալ Նահանգների Զինված ուժերի շտաբների պետերի միացյալ կոմիտեի ղեկավար, գեներալ Ջոզեֆ Դանֆորդը Կոլորադո նահանգի Ասպեն քաղաքում կազմակերպված համաժողովի ընթացքում հայտարարել էր. «Եթե Թուրքիան ի վերջո որոշի Ռուսաստանից ձեռք բերել S-400 համակարգերը, ապա դա Միացյալ Նահանգներում չի կարող մտահոգության տեղիք չտալ»:
Երեկ Թուրքիայի նախագահը հակադարձել է նաև այս հայտարարությանը: «Ինչո՞ւ են Ամերիկայում մտահոգվել S-400 տիպի հակաօդային համակարգերի ձեռք բերման հեռանկարից: Չէ՞ որ ցանկացած պետություն պետք է հստակ քայլեր ձեռնարկի սեփական անվտանգությունն ապահովելու նպատակով»,- լրագրողների հետ զրույցում նշել է Էրդողանը։
Ըստ ամենայնի, չնայած սկզբունքային պայմանավորվածություններին՝ ռուս-թուրքական պայմանագիրը դեռ ստորագրված չէ, և Էրդողանը, սովորության համաձայն, շանտաժ է անում արևմտյան գործընկերներին ԱՄՆ-ի և ԵՄ-ի հետ ճգնաժամային հարաբերությունների ֆոնին: Սակայն Թուրքիայի նախագահի այժմյան ուղերձն ավելի խորքային իմաստ ունի և Վաշինգտոնին ու Բրյուսելին հասկացնում է, որ ի դեմս ռուս-թուրքական ռազմավարական դաշինքի՝ Թուրքիան ունի զարգացման այլընտրանք:
Փաստն այն է, որ Ռուսաստանը, Ադրբեջանից հետո, պատրաստվում է սպառազինել Հայաստանի հանդեպ թշնամական տրամադրված մեր մյուս հարևանին՝ Թուրքիային։ Մեր վայ-հայրենասերները, հավանաբար, հիմա էլ կպնդեն, թե լավ է, որ Ռուսաստանն է Թուրքիային S-400 վաճառում. եթե մեր դաշնակիցը դա չաներ՝ Թուրքիան այն կգներ դավադիր Արևմուտքից: Վազգեն Սարգսյանը նմանների հանար է ասել՝ էս խելքին ենք, որ էս խելքին ենք:
