Երեկ գրեթե նույն ժամերին, երբ Սոչիում տեղի էր ունենում Պուտին-Ալիև հանդիպումը, ադրբեջանական կողմը գնդակոծել է Տավուշի մարզի Բարեկամավան և Չինարի գյուղերը: Սա խոսում է Ադրբեջանի սանձարձակության մասին, մանավանդ, որ Ալիևին Սոչիում սպասվում էին ծանր բանակցություններ: Բաքուն հասկացնում է, որ ցանկացած պարագայում հավատարիմ է մնալու ուժի և շանտաժի քաղաքականությանը, երբ անգամ ճգնաժամային են հարաբերություններն Արևմուտքի ու Մոսկվայի հետ:
Դա այդպես էլ կշարուանակվի, քանի դեռ Մոսկվան շարունակում է սպառազինել Մոսկվային` չնայած ակնհայտորեն չի վստահում Բաքվին: ՀԱՊԿ հանդիպումներում քննարկվում է անգամ սիրիական խնդիրը և դա այն պարագայում, երբ անդամ երկրներից որևէ մեկը չի ահազանգում, որ դաշնակից Հայաստանի սահմանները պարբերաբար ենթարկվում են ոտնձգությունների:
«Չեմ զարմանում, որ Պուտինը հանդիպել է Ալիևի հետ: Ինձ համար դա Հայաստանի եւ Ադրբեջանի նախագահների հանդիպման նախապատրաստման փուլ է»,- այսօր ասել է ՀՀԿ փոխնախագահ Արմեն Աշոտյանը: Վերջինս ակնարկում է, թե երեկ Պուտինը Ալիևին կանչել էր` «մշակելու»: Հանրապետականի թերևս ամենաինտելեկտուալ ներկայացուցչի խոսքի մեջ ճշմարտության մեծ հատիկ կա, սակայն Ալիևի «մշակումը», մեծ հաշվով, կապ չունի ԼՂ խնդրի հետ: Մեր տարածաշրջանի կայունությանը սպառնում է ռուսական սպառազինության մատակարարումն Ադրբեջան և դա շարունակվում է` անկախ Ալիևի «մշակման» գործընթացից:
Եթե, այնուամենայնիվ, առաջնորդվենք Աշոտյանի տրամաբանությամբ, ապա ավելի լավ է` ռուս-ադրբեջանական ճգնաժամը չհաղթահարվի և չնախապատրաստվի Սարգսյան-Ալիև հանդիպում` Պուտինի հովանու ներքո, որովհետև փորձը ցույց է տալիս, որ Մոսկվան ու Բաքուն բարիշում են մեր հաշվին: Ռուս-ադրբեջանական «մեղրամիսի» ժամանակ Պուտինն, ամենայն հավանականությամբ, Սարգսյանին է մշակելու «Հայաստանի եւ Ադրբեջանի նախագահների հանդիպման նախապատրաստման փուլում»: Այդ «մշակումը» լինելու է Ղարաբաղի խնդրով` մեզ կանգնեցնելով 2016-ի ապրիլյան պատերազմի շեմին:
