Քուվեյթի իշխանությունները 15 իրանցի դիվանագետների կարգադրել են հեռանալ երկրից՝ փակելով զինվորական կցորդի և մշակույթի կցորդի աշխատակազմը՝ հայտնում է Sky News Arabia-ն։
«Մենք դիվանագիտական միջոցներ ձեռնարկեցինք երկրում Իրանի դիվանագիտության ներկայացուցիչների դեմ՝ Քուվեյթի իրավունքների պաշտպանության համար»,- հայտարարել է երկրի տեղեկատվության նախարարը:
Հուլիսի 20-ին երկրի իշխանությունները նոտա են հղել Իրանի դեսպանությանը, որտեղ դիվանագետներին տեղեկացրել են զինվորական կցորդի եւ մշակույթի կցորդի աշխատակազմի փակման մասին: Քուվեյթի իշխանությունները 15 իրանցի դիվանագետների կարգադրել են 45 օրվա ընթացքում հեռանալ երկրից, այսպիսով, երկրում մնում են ընդամենը չորս դիվանագետներ Իրանի Իսլամական Հանրապետությունից: Քուվեյթի կառավարությունը դադարեցնում է Իրանի հետ բոլոր միջկառավարական կոմիտեների աշխատանքը:
Այս ամենը տեղի է ունենում Քուվեյթի դատարանի՝ հուլիսի 16-ին կայացրած դատավճռից հետո: Դատարանը բանտարկության է դատապարտել «ալ Աբդալի» խմբավորման բջջի անդամներին: Մեղադրող կողմը պնդել է, որ զինյալները վարժանքներ են անցել Իրանում «Հըզբոլլահ» խմբավորման ղեկավարությամբ։
