ԱԺ փոխնախագահ Էդուարդ Շարմազանովը գործնականում բացառում է լայնամասշտաբ պատերազմը: «Սա կապում եմ նաև Պուտին- Թրամփ հանդիպման հետ», – այսօր լրագրողների հետ հանդիպմանն ասաց նա։
Շարմազնաովն ընդգծեց, որ աշխարհում թիվ մեկ խնդիրն այսօր Սիրիայի ճգնաժամն է։ «Եվ մենք տեսանք, որ գոնե Սիրիայի հարավում երկու գերհզոր տերության նախագահները եկան ընդհանուր հայտարարի», – նշեց նա։
Նրա խոսքով՝ որևէ մեկն Ադրբեջանին թույլ չի տա նոր, մեծ թեժ կետ բացել սիրիական տարածաշրջանին մոտ, որովհետև դա հղի է լուրջ հետևանքներով:
«Չմոռանանք Ադրբեջանի կապը ահաբեկիչների հետ, բայց լայնամասշտաբ պատերազմ թույլ չեն տա գերտերությունները», -ընդգծեց Շարմազանովը։
«Քանի դեռ Ադրբեջանը բանակցային գործընթացում ամբողջական չի վերադարձել ու մտել բանակցային փուլ, ես իրենցից ոչ մի տրամաբանված գործողություն չեմ սպասում: Չեմ բացառում, որ կշարունակվեն նման գործողությունները, բայց պիտի հաշվարկեն, որ իրենց կորուստներն ավելի շատ են լինելու»,-նշեց նա։
Շարմազանովն ընդգծեց, որ ապրիլից հետո ամենաանհավանական զարգացմանը պիտի պատրաստ լինենք առաջինը հոգեբանորեն, քանի որ պիտի վերջնականապես գիտակցենք, որ Ադրբեջանն ու Թուրքիան չեն համակերպվում այս տարածաշրջանում մեկ հայկական պետության գոյությանը, ինչ մնաց երկրորդին:
«Ես այն կարծիքին չեմ, որ եթե ղարաբաղյան հարցը լուծեցինք, հետագայում իրենց հետ խնդիր չենք ունենալու: Մեր այսօրվա սպառնալիքը Թուրքիան է ու Ադրբեջանը, նրանք վարում են մեկ միասնական քաղաքականություն», – ասաց ԱԺ փոխնախագահը։
