Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ ընթանում է Էդվարդ Թորոսյանի, Աշոտ Նավոյանի և Կարեն Գալստյանի գործի դատական քննությունը:
38-ամյա, նախկինում չդատված Էդվարդ Թորոսյանը, 45-ամյա, նախկինում դատված, դատվածությունը մարված Աշոտ Նավոյանը և 38-ամյա, նախկինում դատված, դատվածությունը չմարված Կարեն Գալստյանը մեղադրվում են գողությունների համար:
Ըստ մեղադրանքի՝ Էդվարդ Թորոսյանը նախնական համաձայնության է եկել Աշոտ Նավոյանի հետ: Իր կողմից վարվող «Օպել վեկտրա» մակնիշի տաքսիով 2012 թվականի դեկտեմբերի 7-ին նրա հետ շրջել է Երևան քաղաքի փողոցներով՝ հարմար պահ փնտրելով առաքման մեքենաներից գաղտնի հափշտակություններ կատարելու համար:
Հասնելով Մոլդովական փողոցում գտնվող «Նանելա» սուպերմարկետին՝ Աշոտն ու Էդվարդը նկատել են առաքման «Մերսեդես սպրինտեր» ավտոմեքենան:
Ըստ մեղադրանքի՝ նախապես կատարված դերաբաշխմամբ Նավոյանը այդ մեքենայի սրահից գաղտնի հափշտակել է 150 հազար դրամ ընդհանուր արժողության բաստուրմա, քայլել է Բագրևանդի փողոցի ուղղությամբ, իսկ Թորոսյանը տաքսին վարել է նշված ուղղությամբ ու Նավոյանին, գողոնով հանդերձ, տեղափոխել այլ վայր:
Նույն օրը «Քալանթար» խանութի մոտ «ՎԱԶ-2104» մեքենայի սրահից նրանք գաղտնի հափշտակել են 17 հազար դրամ ընդհանուր արժողության հավի միս:
Առաքման այլ մեքենաներից այս երկյակը հափշտակել է 10 հազար դրամի երշիկներ, 20 հազար դրամ արժողության հավի միս, 10 տուփ բրինձ, 13 հազար դրամ արժողության 12 շիշ օղի:
Նմանատիպ արարք կատարելու վերաբերյալ Էդվարդ Թորոսյանը նախնական համաձայնության է եկել նաև Կարեն Գալստյանի հետ:
Դեկտեմբերի 23-ին Թորոսյանն ու Գալստյանը առաքման մեքենայից հափշտակել են 25 հազար դրամ արժողության 1 արկղ բրինձ և 1 արկղ հնդկաձավար:
Դեկտեմբերի 25-ին նույն զույգը առաքման տարբեր մեքենաներից հափշտակել է 21 հազար դրամ արժողության մեկ արկղ ձու, 35 հազար դրամ արժողության հավի միս, 178 հազար դրամ արժողության 864 հատ «Սնիկերս» ու «Մարս» տեսակի կոնֆետներ, 120 հազար դրամ արժողության 1 արկղ նուշ և 1 արկղ չամիչ, 13 հազար դրամ արժողության մեկ արկղ հավի միս:
Առաքման մեքենաների գծով այս երեք «մասնագետներին» մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 1-ին կետով: Ամբաստանյալների խափանման միջոցը ստորագրությունն է չհեռանալու մասին:
