Սաուդյան Արաբիան նախատեսում է մինչև 2030 թ. կառուցել 16 ատոմային ռեակտոր, որոնց ընդհանուր գինը կկազմի 100 մլրդ դոլար: Այս մասին հաղորդում է Reuters գործակալությունը՝ հղում անելով սաուդյան թերթին:
Սաուդյան Արաբիան, որն աշխարհի թիվ մեկ նավթ արտահանող երկիրն է, փորձում է այս քայլով բավարարել երկրի ներսում աճող էլեկտրաէներգիայի մեծ պահանջարկը: Եվ այդ քաղաքականության մեջ ատոմային ռեակտորների կառուցումը համարվում է հիմնական կետերից մեկը:
«10 տարի հետո մենք կունենանք առաջին երկու ռեակտորները»,- ասել է ատոմային էներգիայի ոլորտում գիտական համագործակցության համակարգող Աբդ Ալ-Ղանի բեն Մելայրաբին: «Դրանից հետո մենք ամեն տարի շահագործման կհանձնենք երկուական ռեակտոր, մինչև որ 2030 թ. կունենանք 16 ռեակտոր»,- ասել է նա:
Հիշեցնենք, որ Ճապոնիայի երկրաշարժից հետո «Ֆուկուսիմա-1» ատոմակայանի վթարը ստիպել է եվրոպական երկրներին հակառակ ուղով գնալ և աստիճանաբար կրճատելով՝ ամբողջությամբ հրաժարվել ատոմային էներգիայից:
