Ֆուտբոլի աշխարհի առաջնության ընտրական փուլում Հայաստանի հավաքականի հետ մրցավեճին նախապատրաստվող Մոնտենեգրոյի ազգային թիմը հունիսի 5-ին սեփական հարկի տակ 1:2 հաշվով զիջեց Իրանին: Սա բալկանյան հավաքականի երրորդ անընդմեջ պարտությունն էր: Մոնտենեգրոյի անհաջողության այս շարքը սկիզբ է առել 2016 թվականի նոյեմբերին՝ Երևանում Հայաստանի հավաքականի հետ մրցավեճում:
Մինչ մեր հավաքականի հետ հանդիպումը՝ Մոնտենեգրոն հյուրընկալվելիս ոչ-ոքի՝ 1:1 էր խաղացել Ռումինիայի հետ, Պոդգորիցայում 5:0 հաշվով ջախջախել Ղազախստանին և Կոպենհագենում 1:0 հաշվով հաղթել Դանիային: 3 հանդիպումներով վաստակած 7 միավորով Մոնտենեգրոն Լեհաստանի հետ կիսում էր առաջին հորիզոնականը, իսկ Հայաստանի հետ հանդիպման առաջին կեսից հետո թվում էր, թե այս հավաքականը ենթախմբում հաղթող ճանաչվելու իրական հավակնորդ է: Երևանյան հանդիպման վերջին 45 րոպեները ոչ միայն մղձավանջային էին Լյուբիշա Տումբակովիչի գլխավոր հավաքականի համար, այլև բացասական իմաստով՝ շրջադարձային:
Խմբային փուլի հաջորդ խաղում Մոնտենեգրոն այս տարվա մարտին սեփական հարկի տակ 1:2 հաշվով զիջեց Լեհաստանին: Վերջին երեք հանդիպումներում Մոնտենեգրոն ընդունել է 7 գնդակ, ինչը խոսում է այն մասին, որ այս հավաքականը լուրջ խնդիրներ ունի պաշտպանությունում: Դրա վկայությունը նաև Իրանի հետ հանդիպումն է: Ունենալով Ստեֆան Սավիչի, Ֆիլիպ Ստոյկովիչի պես փորձառու պաշտպաններ՝ Տումբակովիչի մոտ չի ստացվում կարգավորել խաղը այս օղակում:
«Հայաստանի հավաքականի հետ մրցավեճում մենք պետք է վերջ դնենք անհաջող հանդիպումների շարքին: Վերջին հանդիպումներում չափազանց վատ ֆուտբոլ ենք ցուցադրել, որի համար պատասխանատու ենք բոլորս: Պետք է հոգեբանական և մարտավարական տեսանկյունից լավ պատրաստվենք առաջիկա խաղին: Մենք Իրանի հավաքականին շատ հեշտ թույլ տվեցինք երկու գոլ խփել: Դա մոտիվացիայի պակասի և անփութության հետևանք է: Նույն սխալները պետք է բացառենք Հայաստանի դեմ խաղում»,- ասել է Մոնտենեգրոյի հավաքականի գլխավոր մարզիչը:
Եթե մեր մրցակցի պաշտպանությունը կարելի է համեմատաբար թույլ օղակ համարել, ապա նույնը չես ասի հարձակման մասին: Իրանի դեմ, մասնավորապես, հավաքականի առաջատար Ստեֆան Յովետիչի ջանքերի գրոհները բավական սուր էին և բազմաբնույթ: Մոնտենեգրոյի հավաքականի ուժեղ կողմերից կարելի է համարել հեռահար հարվածները:
Հայաստանի հավաքականի դեմ Մոնտենեգրոն, կարծում ենք, սովորականից ավելի շատ հեռվից հարվածներ կփորձի կատարել՝ գիտակցելով, որ մրցակցի դարպասապահը թույլ է: Հիշենք երևանյան հանդիպումը, երբ ոչ այնքան ուժեղ հարվածը Բեգլարյանը ետ մղեց մրցակցի ֆուտբոլիստի մոտ, ինչի հետևանքով գրանցվեց առաջին գոլը: Նշենք, որ Մոնտենեգրոն սովորաբար գրոհում է 7-8 ֆուտբոլիստներով՝ մրցակցի պաշտպանությունը փորձելով ճեղքել մեկ հպումով փոխանցումներով և հարձակողական ոճի ֆուտբոլիստների տեխնիկական բարձր որակների միջոցով:
Քննադատությունների և դժգոհությունների տարափի հետևանքով Հայաստանի ազգային հավաքականի դեմ Մոնտենեգրոն կամա թե ակամա խաղալու է առաջին համարով: Համաձայնեք նաև, որ Պոդգորիցայում մեր թիմի կողմից առաջին համարով խաղալու փորձը կործանարար հետևանք կունենա: Երկրորդ համարով խաղալը, սակայն, չի նշանակում անցնել խուլ պաշտպանության՝ մտածելով մեկ միավոր պոկելու մասին: Երկրորդ համարով խաղալը ազատ տարածություններ կստեղծի մրցակցի կիսադաշտում:
Ի դեմս Հենրիխ Մխիթարյանի՝ մենք ունենք ֆուտբոլիստներ, ովքեր կարող են արագ և արդյունավետ հակագրոհներ կազմակերպել: Արագ գրոհների միջոցով հաջողության հասնելը այսօր մեր գլխավոր զենքն է: Փաստ է նաև, որ Արթուր Պետրոսյանը օժտված է մրցակցի խաղը ճշգրիտ կարդալու ունակությամբ, ինչի ապացույցը Մոնտենեգրոյի և Ղազախստանի դեմ հանդիպումներն են:
Ինչ խոսք, առաջիկա հանդիպումը էլ ավելի բարդ է, բայց հաղթանակը իրատեսական է: Հաղթանակի դեպքում իրատեսական կլինի աշխարհի առաջնության եզրափակիչ փուլի ուղեգրի համար պայքարը: Հիշեցնենք, որ ընտրական փուլում 5-րդ տուրից հետո Հայաստանի հավաքականն ունի 6, իսկ Մոնտենեգրոն՝ 7 միավոր:
