Երևանի ավագանու ընտրությունների օրը ՀՀԿ շտաբում տեղի ունեցած բռնությունից հետո Զարուհի Փոստանջյանը ասուլիսի ժամանակ հայտարարեց, որ դժոխքի է վերածելու Տարոն Մարգարյանի կյանքը։ Ընտրություններից հետո ստացած հինգ մանդատները «Երկիր ծիրանի» կուսակցությունը որոշեց վերցնել: Փոստանջյանի խոսքով՝ քաղաքապետարանի համար իրենք արդեն իսկ ունեն լիազորություններ, այդ լիազորությունները իրենց տվել են քաղաքացիները:
«Ազատություն» ռադիոկայանի լրագրողի հարցին՝ Տարոն Մարգարյանի կյանքը դժոխքի վերածելու խոստումներն ուժի մե՞ջ են, Փոստանջյանը պատասխանել է. «Կտեսնեք՝ ինչպես է Տարոն Մարգարյանն աշխատելու Զարուհի Փոստանջյանի մոտ՝ որպես բռնազավթիչ քաղաքապետ»:
Տարոն Մարգարյանն էլ իր կյանքը դժոխքի վերածելու՝ Փոստանջյանի հայտարարությանն արձագանքել էր. «Կարծում եմ՝ շատ հետաքրքիր նիստեր են անցնելու: Ներկա կլինեք՝ կտեսնեք»:
ՀՀԿ ավանագու անդամ Նաիրա Նահապետյանը, «Առաջին լրատվական»-ի հետ զրույցում անդրադառնալով Փոստանջյանի հայտարարությանը, նշեց. «Ես դեռ իրեն չեմ ճանաչում, երբ իրեն ճանաչեմ, տեսնեմ՝ ինչ ինքը նկատի ունի, նոր կկարողանամ մեկնաբանել: Հիմա ամեն մի ցնդաբանություն կարո՞ղ եմ ես մեկնաբանել»:
Երևանի ավագանու «Ելք» դաշինքի խմբակցության ղեկավար Դավիթ Խաժակյանն էլ «Առաջին լրատվական»-ի հետ զրույցում պատասխանելով հարցին, թե արդյոք միանալո՞ւ են Զարուհի Փոստանջյանի՝ Տարոն Մարգարյանի կյանքը դժոխքի վերածելու հայտարարությանը, ասաց. «Ես կարող եմ ասել, որ աշխատելու ենք, որպեսզի երևանցիների կյանքը դրախտի վերածենք, եթե այդ հարթության մեջ նայենք: Մեր աշխատանքն ուղղված է լինելու մարդկանց կյանքը բարելավելուն, ոչ թե ինչ-որ մեկի կյանքը վատացնելուն, նույնիսկ եթե դա վերաբերում է ՀՀԿ ներկայացուցչին»:
Ավագանին, նրա խոսքով, կոլեգիալ մարմին է, որը կարող է ստեղծել քննիչ հանձնաժողով. «Եթե նույնիսկ հաշվի չառնենք, որ այն դրական փոփոխությունները, որ մենք կարող ենք իրականացնել՝ առաջարկելով և հիմնավորելով այդ առաջարկը, Երևանի ավագանու խմբակցությունը կարող է ստեղծել քննիչ հանձնաժողով շատ տարբեր հարցեր քննելու և բացահայտելու համար: Քննիչ հանձնաժողովի լիազորությունները բավականին լայն են, և մեկ խմբակցության որոշմամբ հնարավոր է դա իրականացնենք, և մենք օգտվելու ենք մեր այդ լիազորությունից»:
Նա նշեց, որ իրենք ունեն ծրագիր մարդկանց կյանքը բարելավելու համար, իսկ թե այլ ուժեր ինչ պլաններ ունեն՝ թող իրագործեն այդ պլանները:
Արդյոք «Ելքը» տեսնո՞ւմ է Երևանի ավագանու «Երկիր ծիրանի» խմբակցոթյան հետ համագործակցության հնարավորություն, Դավիթ Խաժակյանն արձագանքեց. «Բնականաբար, տեսնում ենք, բայց այն հարթության մեջ, որ ես ասացի՝ համագործակցություն հանուն փոփոխությունների, համագործակցություն հանուն Երևանի բարեկարգման և բարելավման. մենք եկել ենք կոնկրետ աշխատանք տանելու: «Ելք» դաշինքն ասում է, որ եկել է փոփոխություններ բերելու, ոչ թե հին խնդիրների մասին անդադար խոսելու»:
