Մայիսի 29-ին Բուենոս Այրեսում նշվեց Հանրապետության օրը: Սուրբ Գրիգոր Լուսավորիչ Մայր տաճարում` Արգենտինայում և Չիլիում Հայ Առաքելական եկեղեցու առաջնորդ Գիսակ արք. Մուրադյանի կատարած աղոթքից և Ն.Ս.Օ.Տ.Տ. Գարեգին երկրորդ Ամենայն Հայոց Կաթողիկոսի շնորհավորական ուղերձն ընթերցելուց հետո հանդիսությունը տեղափոխվեց Մայր տաճարի հարևանությամբ` Թեքեյան մշակութային միության բակում գտնվող Սարդարապատի հերոսներին նվիրված հուշարձանի մոտ:
Արգենտինայում Հայաստանի դեսպան Վլադիմիր Կարմիրշալյանը, Գիսակ արք. Մուրադյանը և համայնքային կառույցների ղեկավարները ծաղկեպսակ զետեղեցին Սարդարապատի հերոսների հուշարձանի մոտ: Ելույթներով հանդես եկան Բուենոս Այրեսի «Սարդարապատ» շաբաթաթերթի գլխավոր խմբագիր, ՌԱԿ Հարավային Ամերիկայի մասնաճյուղի ատենապետ Սերխիո Նահապետյանն ու դեսպան Վլադիմիր Կարմիրշալյանը:
Դեսպանն իր ելույթում, մասնավորապես, նշեց. «Սարդարապատի, Բաշ Ապարանի և Ղարաքիլիսայի համաժողովրդական հերոսամարտերի շնորհիվ 6 հարյուրամյակների ընդմիջումից հետո ծնունդ առավ և իբրև ինքնուրույն պետություն միջազգային թատերաբեմ վերադարձավ Հայաստանի Հանրապետությունը: …Չնայած իր գոյության կարճ ժամանակահատվածին, առաջին Հանրապետությունը հասցրեց լուրջ նախադրյալներ ստեղծել մեր երկրի ու ժողովրդի զարգացման համար, ամենակարևորը` այն կարողացավ սերունդներին փոխանցել նոր` պետականություն կրող ազգի արժեքային համակարգ, սեփական երկրի քաղաքացի լինելու գիտակցություն»: Այնուհետև Վլադիմիր Կարմիրշալյանը նշեց, որ «ազատության և անկախության ոգին էր, որ տասնամյակներ հետո պոռթկաց Արցախում, Հայաստանում ու Սփյուռքում»:
Միջոցառումն ավարտվեց մասնակիցների կողմից «Սարդարապատ» երգի կատարմամբ:
