Грузия Online-ը, վկայակոչելով «Ռուսթավի 2» հեռուստաընկերությանը, հայտնում է, որ ոստիկանությունը փնտրում է մի մոլագարի, որը Թբիլիսիի կենտրոնական շրջանում մի շարք հարձակումներ է իրականացրել կանանց վրա։
Հեռուստաընկերության տվյալներով, մեկ շաբաթ առաջ անհայտ անձը Թբիլիսիի Սաբուրտալինի շրջանում գտնվող շենքերից մեկի շքամուտքում հարձակվել էր մի կնոջ վրա ու դանակի բազմաթիվ հարվածներ հասցրել նրան։ Արդյունքում տուժածը հայտնվել էր վերակենդանացման բաժանմունքում։
Երկրորդ դեպքը գրանցվել է երկուշաբթի առավոտյան՝ ժամը 07:00-ին մոտ, Հերոսների հրապարակում։ Սակայն այս անգամ հարձակման ենթարկված կնոջը հաջողվել էր կծել մոլագարի ձեռքը և աղմուկ բարձրացնել։ Արդյունքում, մոտակայքով անցնող ավտոմեքենան արգելակել էր, ինչից հետո վախեցած հանցագործը բաց էր թողել կնոջն ու փախուստի դիմել։
Հեռուստաընկերության հաղորդմամբ, այս երկու դեպքում էլ համընկել են մոլագարի արտաքին տվյալները. սև մազեր, մորուքավոր, վայելչակազմ, մինչև 40 տարեկան։ Բացի այդ, երկու դեպքում էլ հարձակման ենթարկված կանայք ունեցել են 50-ից բարձր տարիք։
Այս կապակցությամբ ոստիկանությունը դեռևս մեկնաբանություններ չի արել։