Անկախ նրանից՝ ով կդառնա վարչապետ 2018 թվականին, ՀՀԿ-ի քաղաքական պատասխանատվությունը չի նվազելու: Ազատություն» ռադիոկայանի եթերում ասել է ՀՀԿ խոսնակ, ԱԺ փոխնախագահ Էդուարդ Շարմազանովը:
Նրա խոսքով՝ այս կառավարության քաղաքական պատասխանատուն լինելու է ՀՀԿ-ն, որովհետև ՀՀ բնակչության մեծամասնությունը պառլամենտական ընտրություններին առաջիկա 5 տարվա համար ՀՀԿ-ին տվել է մանդատ, որպեսզի ունենա կառավարությունը ձևավորելու իրավունք՝ «ՀՅԴ»-ի հետ:
«Անձերն այլևս չեն գալիս առաջնային տեղեր, առաջնային են դառնում կուսակցությունները, կուսակցական թիմերը, կուսակցական գաղափարախոսությունը. պառլամենտական համակարգի տարբերությունը կիսանախագահական և նախագահական համակարգերից սա է»,-նշել է Էդուարդ Շարմազանովը:
Նա տեղեկացրել է, որ այս պահին իրենք ձևավորում են 2017 թվականի կառավարությունը, որը կգործի մինչև 2018 թվականի ապրիլ: Ըստ նրա՝ երբ 2018 թվականը գա, այն ժամանակ քաղաքական մեծամասնությունը, կոալիցիոն երկու կուսակցությունները կքննարկեն և կորոշեն, թե ով է լինելու վարչապետը:
«Մենք պատրաստ չենք այսօր խոսել 2018 թվականի զարգացումների մասին: 18 թվականի ապրիլից հետո այս կառավարությունը պիտի հրաժարական տա, ինչպիսի կառավարություն կլինի, ով կլինի այդ կառավարության կազմում, ով կգլխավորի, կերևա քննարկումների արդյունքում՝ կոալիցիոն երկու ուժերի միջև՝ ՀՀԿ և ՀՅԴ»,- պարզաբանել է ՀՀԿ խոսնակը:
Այն հարցին, թե արդյոք Կարեն Կարապետյանը կշարունակի լինել վարչապետ 2018-ի կառավարությունում՝ Էդուարդ Շարմազանովը պատասխանել է, որ Կարեն Կարապետյանի կառավարության քաղաքական պատասխանատուն նաև Հանրապետականն է լինելու. «Խնդրանքս՝ արհեստականորեն մեր կուսակցության նախագահի առաջին տեղակալին մի անջատեք Հանրապետական թիմից»:
Այն դիտարկմանը, թե արդյոք չկա՞ մոտավոր որոշում կամ քննարկումներ, թե ով կլինի վարչապետն այն դեպքում, երբ կա ծրագիր 2040 թվականի ժողովրդագրական զարգացումների մասին, ԱԺ փոխնախագահն ասել է. « 2040-ին մենք ունենք տեսլական: Մենք ունենք նպատակ՝ համազգային, ոչ թե քաղաքական: Գլխավոր ֆիգուրը լինելու է Հանրապետական կուսակցությունը, ժամանակը կգա, կքննարկենք, բոլոր ժողովրդավարական, նորմալ երկրներում քննարկում են կոնկրետ ժամանակին: Մենք դեռ այս կառավարությունն ամբողջությամբ չենք նշանակել պարոն Նախագահի հրամանով, թող բոլորը նշանակվեն, աշխատեն, 2018 թիվը կգա՝ բարին հետը, ես այլ պատասխան չունեմ»:
Լուսանկարը՝ PAN Photo-ի
