Եվրասիական միությունն այնտեղ է, ուր սկսվում է համատարած կոռուպցիան, օլիգարխների իշխանությունն ու փողոցներում թափված աղբը», – «Ազատություն» ռադիոկայանի փոխանցմամբ՝ հինգշաբթի երեկոյան Թբիլիսիում ուսանողների հետ հանդիպման ընթացքում հայտարարել է Վրաստանի նախագահ Միխեիլ Սաակաշվիլին:
Վրաստանի ղեկավարը ծավալուն հայտարարությամբ հանդես է եկել այն բանից հետո, երբ երկրի վարչապետ Բիձինա Իվանիշվիլին «Ազատություն» ռադիոկայանի վրացական ծառայությանը տված հարցազրույցում շաբաթ օրը չի բացառել, թե Վրաստանը մի օր կարող է անդամակցել Եվրասիական միությանը:
«Վարչապետ Իվանիշվիլին խախտեց վրացական քաղաքականության գլխավոր տաբուն: Դա, իհարկե, նրա` որպես ընտրված պաշտոնյայի իրավունքն էր, բայց իրականությունը դրանից չի փոխվում: Մենք կրկին վիճում ենք մի խնդրի շուրջ, որի վերաբերյալ քաղաքական ուժերը կարծես վաղուց արդեն լիակատար փոխհամաձայնության էին եկել: Մենք կրկին վիճում ենք Վրաստանի աշխարհաքաղաքական կողմնորոշումների մասին», – ասաց Սաակաշվիլին՝ շարունակելով․ – «Երբ ես խոսում էի Վրաստանի արտաքին քաղաքականության «հայկականացման» մասին, ես հենց դա նկատի ունեի: Հայաստանը մեր բարեկամ պետությունն է, սակայն Երևանը որոշեց անդամակցել Մաքսային միությանը: Կարող եմ միայն ասել, որ դա Վրաստանի համար լավագույն օրինակը չէ»:
Վրաստանի նախագահը համոզված է` պաշտոնական Մոսկվան ինտեգրացիոն պրոցեսների խթանման միջոցով ցանկանում է հետ բերել խորհրդային ժամանակաշրջանը:
«Պուտինի և նրա շրջապատի համար Եվրասիական միությունը Խորհրդային Միության նոր տարբերակն է: Այդ նախագծի միջոցով նրանք ցանկանում են կանխել մեր առաջընթացը դեպի ՆԱՏՕ և Եվրոպական միություն», – նշել է Սաակաշվիլին՝ համոզմունք հայտնելով, որ Եվրասիական միությունը՝ երեկվա օրն է:
«Եվրասիական հասարակությունը՝ համատարած կոռուպցիան է, իշխանության կողմից հանրությանը ներկայացվող հաշվետվությունների բացակայությունն ու ճնշումը փոքրամասնությունների վրա: Եվրասիան` բանտարկված ընդդիմախոսներն են ու փողոցում պպզած տղաները, օլիգարխիկ տնտեսությունն ու փողով ստացվող վարորդական իրավունքները», – հայտարարել է Վրաստանի նախագահը:
