Սիրիան համաձայնել է միջազգային վերահսկողությանը փոխանցել իր քիմիական զենքը ի պատասխան Ռուսաստանի նախաձեռնության, ոչ թե ամերիկյան ագրեսիվ սպառնալիքների առջև վախի պատճառով: Այս մասին հայտնել է Սիրիայի նախագահ Բաշար Ասադը «Ռոսիա 24» հեռուստաալիքին տված հարցազրույցում:
Նրա խոսքով՝ Սիրիան նման քայլի է գնացել, որպեսզի չմասնակցի նոր խելահեղ պատերազմի, որը Մերձավոր Արևելքում մտադիր են սանձազերծել ԱՄՆ-ի ռազմատենչ շրջանակները: Ասադի խոսքով՝ «տարածաշրջանի ժողովուրդները, մասնավորապես՝ Աֆղանստանը և Իրաքը մինչ օրս վճարում են ամերիկյան արկածախնդրության համար»: Սիրիայի նախագահը նշել է, որ Ռուսաստանն իր հերթին «հաստատել» է, որ մեծ տերություն է, որի վրա կարելի է հենվել, այդ իսկ պատճառով իրենք ընդունել են առաջարկը:
Ասադն ընդգծել է, որ պնդում է ՄԱԿ-ի փորձագետների պատվիրակության վերադարձը: Նա կարծում է, որ պատվիրակությունը պետք է ավարտի աշխատանքը՝ համաձայն պայմանավորվածությունների, և լինի այն շրջաններում, որտեղից ստացվել են քիմիական լիցքերի կիրառման մասին ազդանշանները:
«Դա անհրաժեշտ է՝ պարզելու համար, թե որտեղից են գրոհայինները ստացել թունավոր գազերը: Երկրները, որոնք նրանց քիմիական նյութեր են փոխանցել և թույլ են տվել կիրառել, պետք է պատասխանատվության ենթարկվեն»,- ասել է Ասադը:
Սիրիայի նախագահը նշել է, որ Վաշինգտոնն այդպես էլ համոզիչ ապացույցներ չի ներկայացրել Դամասկոսի դեմ ուղղված իր մեղադրանքներում: Նրա խոսքով՝ ԱՄՆ-ը նախկինում ևս՝ Բուշ կրտսերի օրոք, կիրառել է քարոզչական հնարքներ՝ իր պատերազմներն արդարացնելու համար:
Այնուհանդերձ, Ասադը կարծում է, որ Օբամայի վարչակազմը ստում է ավելի քիչ պրոֆեսիոնալ, քան նրա նախորդները: «Նրանք այս անգամ չեն կարողացել ստով համոզել նույնիսկ իրենց դաշնակիցներին»,- ասել է Սիրիայի նախագահը:
