Այսօր՝ ապրիլի 30-ին Գարեգին Նժդեհի հրապարակում նախընտրական հանրահավաք է կազմակերպել «Ելք» դաշինքը: ԱԺ պատգամավոր, Ելք դաշինքի անդամ Էդմոն Մարուքյանն իր ելույթում նշեց, որ իրենց քաղաքական հակառակորդները փորձում են Երևանի ավագանու ընտրությունները իջեցնել թաղային մակարդակի. «Ինչ-որ մարդիկ ելույթներ են ունենում Տարոն Մարգարյանի քարոզարշավի ժամանակ և տարբեր անվանարկում են անում։ «Բեզդելնիկներ» են դուրս եկել մեր դեմ։ Որևէ քաղաքական արժեք չունենալով, մտավորականի արժեք չունենալով, վտանգի տակ են դնում Հայաստանում մտավորականների մասին ունեցած պատկերացումները։ Նրանք բեզդելնիկ մտավորականներ են, որ բանուգործ չունենալով, մի քարոզարշավից մյուսն են գնում ու ելույթներ ունենում։ Նրանք իրենց ելույթներով հակագովազդ են անում իրենց տերերին»,-հայտարարեց «Ելք»-ի ներկայացուցիչը՝ հավելելով, որ «Ելք» դաշինքը հասկանում է, որ փոփոխությունների հասնելու համար կարևոր են նաև բոլոր ՏԻՄ ընտրությունները. «Մենք հնարավորության դեպքում մասնակցելու ենք բոլոր ընտրություններին՝ սկսած ամենափոքր գյուղի ընտրությունից»։
Հիշեցնենք՝ օրեր առաջ ՀՀԿ-ի կողմից Երևանի քաղաքապետի թեկնածու Տարոն Մարգարյանի նախընտրական հանդիպումներից մեկի ժամանակ ՀՀԿ ավագանու թեկնածու Լևոն Իգիթյանը հայտարարել էր. «Տարոն Մարգարյան, Զարուհի Փոստանջյան, Նիկոլ Փաշինյան. ինչո՞վ հիշեմ այս երեք թեկնածուներին: Զարուհի Փոստանջյանը միջազգային հարթակներում օտարների ներկայությամբ իմ երկրի վրա ցեխ էր շպրտում: Նիկոլ Փաշինյանը մարտի ծանր օրերին ավտոբուսների, տրոլեյբուսների «կռիշներում» վազվզում էր ու գոռում՝ ջարդե՛ք, փշրեք, վառե՛ք…: Ինչքան «բեզդելնիկ» կա, մտել է քաղաքականություն… Իսկ Տարոն Մարգարյանը սիրում է աշխատել, գործով է զբաղված»։
Մանրամասները՝ տեսանյութում:
