Հունիսի 10-ին ֆուտբոլի Հայաստանի ազգային հավաքականը աշխարհի 2018 թվականի առաջնության ընտրական փուլում անչափ կարևոր հանդիպում կանցկացնի՝ հյուրընկալվելով Մոնտենեգրոյին: Ենթախբում իրավիճակն այնպիսին է, որ պարտության դեպքում մեր հավաքականը ըստ էության կզրկվի երկրորդ հորիզոնականի համար պայքարելու հնարավորությունից: Մասնավորապես, 2-րդ և 3-րդ հորիզոնականներում գտնվող Դանիան և Մոնտենեգրոն ունեն 7-ական, իսկ 4-րդ և 5-րդ տեղերը զբաղեցնող Ռումինիան և Հայաստանը՝ 6-ական միավոր:
Հայաստանին հաղթելու դեպքում Մոնտենեգրոն կունենա 10 միավոր, և վերջին 4 հանդիպումներում մերոնց համար բավական բարդ կլինի ետ բերել կորցրածը և տեղ զբաղեցնել երկրորդ հորիզոնականում: Բարդ կլինի՝ հաշվի առնելով այն, որ խմբային փուլի առաջին հինգ հանդիպումներում Հայաստանի հավաքականից որևէ հարձակվող աչքի չի ընկել: Խփված բոլոր գոլերը հեղինակել են կիսապաշտպաններն ու պաշտպանները:
Եվս մեկ անգամ նշենք, որ ընտրական ենթախմբում Հայաստանի հավաքականի համար բացառիկ հնարավորություն է ստեղծվել եզրափակիչ փուլի ուղեգրի համար պայքարելու: Եթե Մոնտենեգրոյին Վազգեն Սարգսյանի անվան «Հանրապետական» մարզադաշտում հաղթեցինք մասնավորապես նվիրվածության և էնտուզիազմի շնորհիվ, ապա հյուրընկալվելիս այս գործոնները դժվար թե բավարարեն երեք միավոր վաստակելու համար: Բալկանյան երկրների հավաքականները սեփական հարկի տակ արագ և ինչ-որ տեղ նաև ագրեսիվ խաղ են ցուցադրում:
Հայաստանի ազգային հավաքականի երկրպագուների հիմնական մասը առաջիկա մրցավեճում մեր հավաքականի հնարավոր հաղթանակը ասոցացնում է «Ռեալ Սոլթ Լեյքի» հարձակվող Յուրա Մովսիսյանի մասնակցության հետ: Վերջին շրջանում Մովսիսյանն ուղղակի փայլուն խաղ է ցուցադրում ՄԼՍ-ում և դարձել է իր թիմի առաջատարը:
Անդրադարձել էինք, որ Մովսիսյանի վերադարձը ազգային հավաքականի համար ոչ միայն այլընտրանք է, այլ նաև հասարակական պահանջ: Հայաստանի ֆուտբոլի ֆեդերացիայի նախագահ Ռուբեն Հայրապետյանը, բազմիցս պատասխանելով լրագրողների և երկրպագուների հարցադրումներին, հայտարարել էր, որ Մովսիսյանի, ինչպես նաև Գևորգ Կասպարովի և Ռոբերտ Արզումանյանի վերադարձը ազգային թիմ իր ղեկավարության պայմաններում անհնար է:
Վերջին շրջանում, երբ Մովսիսյանի վերադարձի վերաբերյալ խոսակցությունները էլ ավելի լայն թափ են ստացել, ԱՄՆ-ում հանդես եկող հայ հարձակվողի համար, այսպես ասած, վերադարձի միջանցք է բացվել:
«Առաջին լրատվական»-ի տեղեկություններով՝ Մովսիսյանը կրկին Հայաստանի ազգային հավաքականի մարզաշապիկը կրելու հնարավորություն կունենա, եթե հրապարակավ ներողություն խնդրի ոչ բարեխիղճ արարքի համար: Պատեհ չհամարելով այս պահին անդրադառնալ հայտնի կոնֆլիկտային խնդրին՝ կարծես պարզ է դառնում, որ Մովսիսյանի վերադարձով այսօր հետաքրքրված են նաև ֆուտբոլի ասպարեզում ղեկավար անձինք: Ակնհայտ է, որ խնդիրը կկարգավորվի կողմերից մեկի զիջման կամ փոխզիջումների դեպքում:
Միևնույն ժամանակ հասկանալ է պետք, որ զիջումներից խուսափելու պարագայում առաջին հերթին կտուժի Հայաստանի ազգային հավաքականը, որը տևական դադարից հետո կարծես կրկին վերելքի ուղու վրա է: Տա Աստված, որ Հայաստանի հավաքականն առանց Յուրա Մովսիսյանի հաղթի Մոնտենեգրոյին և լուրջ հայտ ներկայացնի ընտրական ենթախմբում երկրորդ հորիզոնականը զբաղեցնելու: Առանց Մովսիսյանի պարտվելու դեպքում, սակայն, մարզասերների գերակշռող մեծամասնությունը կնկատի, որ Յուրայի խաղալու դեպքում հնարավոր է արդյունքը դրական լիներ: Ու այդ դեպքում վստահաբար կարելի կլինի ասել, որ աշխարհի առաջնության ընտրական փուլում կրկին անգամ Հայաստանի ազգային հավաքականը ներանձնային հարաբերությունների զոհը դարձավ և զրկվեց Ռուսաստանում կայանալիք եզրափակիչ փուլին մասնակցելու հնարավորությունից:
