Հայաստանի Հանրապետության Ազգային ժողովը քննարկում է «Մարդու վերարտադրողական առողջության և վերարտադրողական իրավունքների մասին» Հայաստանի Հանրապետության օրենքում լրացումներ կատարելու մասին օրենքի նախագիծը:
Սեպտեմբերի 9-ին՝ ԱԺ աշնանային նստաշրջանի առաջին նիստի ժամանակ ԱԺ առողջապահության, մայրության և մանկության հարցերի մշտական հանձնաժողովի նախագահ, օրենքի նախագծի համահեղինակ Արա Բաբլոյանը նշեց, որ նախատեսում են օրենքում մի շարք լրացումներ կատարել, ինչպես՝ «կինն իրավունք ունի անվճար կամ արտոնյալ պայմաններով ստանալու վերարտադրողականության օժանդակ տեխնոլոգիաների կիրառմամբ բժշկական օգնություն և սպասարկում` պետության կողմից երաշխավորված առողջապահական պետական նպատակային ծրագրերի շրջանակներում»:
Օրենքի նախագիծը սահմանում է նաև, որ անվճար կամ արտոնյալ պայմաններով վերարտադրողականության օժանդակ տեխնոլոգիաների կիրառմամբ բժշկական օգնության և սպասարկման կարգը, ինչպես նաև շահառուներին ներկայացվող պահանջները հաստատում է Հայաստանի Հանրապետության կառավարությունը: Սույն օրենքն ուժի մեջ է մտնում 2014 թ. հունվարի 1-ից:
ԱԺ ուշադրությանը ներկայացվեց նաև Բաբլոյանի և նույն հանձնաժողովի անդամ Մկրտիչ Մինասյանի համահեղինակած «Երեխաներին կրծքով կերակրման խրախուսման և մանկական սննդի շրջանառության մասին» օրենքի նախագիծը: Այն կարևորելով՝ Բաբլոյանը նշեց, որ հետաքրքիր զուգադիպությամբ ԱԺ-ում առաջիկա օրերին քննարկման կդրվեն օրենքի մի քանի նախագծեր, որոնք փոխկապակցված են: Դրանք նվիրված են մարդու վերարտադրողական առողջությանն ու իրավունքներին, ինչպես նաև՝ երեխայի առողջությանը:
