Հայաստանում ներայումս գործում են 215-ից ավելի աղանդավորական խմբավորումներ: Դրանք առավել ակտիվ գործունեություն ծավալել են հատկապես Սպիտակի երկրաշարժից հետո` օգտվելով մարդկանց ծանր հոգեբանական վիճակից: Այսօր կայացած մամուլի ասուլիսի ժամանակ այս մասին ասաց Մայր Աթոռ Ս. Էջմիածնի միաբան,Կոմիտաս վարդապետ Հովնանյանը:
«Ամենասարսափելին ամերիկացի Դեյվիդ Բերգի հիմնադրած և միայն վերջերս Ուկրաինայից Հայաստան մուտք գործած «Քրիստոնեական միջազգային ընտանիք» աղանդն է, որը քարոզում է մանկապղծություն, միասեռականություն, ինցեստ, ինքնասպանություն, մոր հարաբերություն տղայի, հոր հարաբերություն աղջկա հետ, քրոջ հարաբերություն` եղբոր հետ: Սա պետական կառույցի, ընտանիքի քայքայում է, ինչը խիստ մտահոգիչ է: Աղանդները մեր երկիր բերողները մեզ դնում են ոչ թե հավատացյալ հոտի, այլ խոտակեր ոչխարների տեղ: Նման տականքներին չպետք է թույլ տալ, որ նրանք գան ու այլասերեն մեր երեխաներին: Այդ է պատճառը, որ մեզ ազգային շահը պաշտպանող ծրագիր է անհրաժեշտ: Ինչո՞ւ Իսրայելը իր տարածք որևէ աղանդ չի թողնում: Ես շատ կուզեի, որ այս առումով նմանվեինք հրեաներին»,- ասաց նա:
«Առաջին լրատվական»-ի հարցին, թե ինչ է անում հայ եկեղեցին` կանխելու նոր աղանդի տարածման գործընթացը, Կոմիտաս վարդապետ Հովնանյանը պատասխանեց. «Ամեն ինչ: Մեր տղաները` ընդամենը երեք հարյուր հոգի, գիշեր-ցերեկ պայքարում են այս երևույթի դեմ: Սակայն մենք շատ քիչ ենք :Մինչդեռ, աղանդավորներից յուրաքանչյուրը քարոզիչ է, իսկ առաքելական եկեղեցու հավատացյալներից` շատ քչերը»:
Հոգևորականն անթույլատրելի համարեց, որ Հայ առաքելական եկեղեցու մասին մամուլը դատում է Նավասարդ արքեպիսկոպոս Կճոյանի «բենթլիների թեմայով»` նկատելով, որ վերջինս կազմակերպչական հրաշալի ջիղ ունեցող անձնավորություն է:
Ասուլիսի մյուս բանախոս, «Միացյալ երիտասարդական լիգայի» համանախագահ Սևակ Հովհաննիսյանն էլ իր հերթին նկատեց, որ աղանդը Հայաստանում ունի դեռևս տասը հետևորդ, ովքեր տնային հավաքներ կազմակերպում են Երևանում և Արտաշատում: ««Քրիստոնեական միջազգային ընտանիք» աղանդի գործունեությունը եվրոպական մի շարք երկրներում արգելված է: Այդ է պատճառը, որ շատ հաճախ նրանք հանդես են գալիս այլ անուններով` «Աստծո երեխաներ» և այլն: Նրանք ունեն կայքեր, որոնցում տարածում են պիղծ այնպիսի մի միտք, որ Աստված աշխարհի ամենագլխավոր կավատն է»,- ասաց նա:
Լուսանկարը՝ PanARMENIAN Photo-ի