Ռուսաստանում այս կիրակի կայացած ընտրություններում Վլադիմիր Պուտինի կառավարման 13 տարիների ընթացքում առաջին անգամ ընդդիմությունը ստացել է առավել բարձր արդյունքներ՝ գրում է The Guardian-ը:
Երկու խոշոր քաղաքներում՝ Մոսկվայում և Եկատերինբուրգում, քաղաքապետի ընդդիմադիր թեկնածուները ստացել են զգալի թվով ձայներ: Նախնական տվյալներով՝ Եկատերինբուրգում հաղթում է «Քաղաքացիական հարթակ» կուսակցության ակտիվիստ Եվգենի Ռոյզմանը, ինչը թերթի կարծիքով՝ խայտառակություն է Կրեմլի համար:
Քվեաթերթիկների 80 տոկոսի հաշվարկման արդյունքում Մոսկվայի քաղաքապետի թեկնածու Ալեքսեյ Նավալնին ստացել է 27 տոկոս ձայն: Չնայած այն բանին, որ քաղաքապետի պաշտոնակատար Սերգեյ Սոբյանինը հավաքել է 51 տոկոս ձայն, «իշխանությունը հասկացել է, որ ժողովուրդը դժգոհ է իշխող էլիտայից»:
«Ցանկացած դեպքում ընդդիմության առաջնորդի անսպասելի բարձր արդյունքը, որին նա հասել է իր «փողոցային» արշավով, թվում է՝ կդառնա կարևոր շրջադարձային պահ Ռուսաստանի քաղաքական կյանքում»,- ասվում է հրապարակման մեջ:
