Այսօր Եվրոպայում մեծ ֆուտբոլային տոն էր: Աշխարհի ամենաուժեղ ակումբային մրցաշարի եզրափակիչում Լոնդոնի «Ուեմբլի» մարզադաշտում հանդիպում էին աշխարհի ներկա պահի երկու ամենաուժեղ թիմերը` «Բարսելոնա»-ն և «Մանչեսթեր Յունայթեդ»-ը:
Խաղի հենց ամենասկզբից ակնհայտ դարձավ, որ այն արդարացնելու է երկրպագուների ակնկալիքները: Խաղադաշտում ընթանում էր ակտիվ և դիտարժան ֆուտբոլ: Առաջին գնդակը իրեն երկար սպասել չտվեց: Այն 27-րդ րոպեին հեղինակեց Պեդրոն: Եվ չնայած որ թե՛ գոլից առաջ, թե՛ դրանից հետո կապտանռնագույնները պահպանում էին խաղային առավելությունը, այդուհանդերձ րոպեներ անց անգլիացիները հաջող հակագրոհի արդյունքում խփեցին պատասխան գնդակը. Ռունի, 34-րդ րոպե, ինչն էլ առիթ տվեց հուսալու, որ երկրորդ խաղակեսը ոչ պակաս հետաքրքիր է լինելու:
Այդպես էլ եղավ: Սուլիչից ընդամենը ինը րոպե անց այս հանդիպման ընթացքում իր հեղինակավոր խոսքն ասաց նաև մոլորակի լավագույն ֆուտբոլիստը` առաջ մղելով կատալոնյան սուպեր ակումբին: Իսկ «Մանչեսթերի» և նրա երկրպագուների հույսերը ի չիք դարձրեց Դավիդ Վիլյան` 69-րդ րոպեին հեռահար գեղեցիկ հարվածով հաշիվը դարձնելով 3-1:
Խաղի արդյունքը, որը նաև 2010-2011 թթ մրցաշրջանի վերջնական արդյունքն էր, թերևս միանգամայն օրինաչափ էր: Պեպ Գվարդիոլայի թիմը ողջ տարվա ընթացքում դրսևորել էր բացառիկ կայունություն և խաղի որակ` այդպիսով արժանանալով ամենաբարձր գնահատականների բոլորի, այդ թվում` այսօրվա մրցակցի գլխավոր մարզիչ Ալեքս Ֆերգյուսոնի կողմից:
Այսպիսով, այս տարի ևս, ինչպես երկու տարի առաջ, Չեմպիոնների լիգայի գավաթը կուղևորվի Բարսելոն:
«Առաջին լրատվականը» ուղիղ ռեժիմով լուսաբանում էր հանդիպման ընթացքը իր ֆեյսբուքյան էջում: Խաղի վերաբերյալ ձեր տպավորությունները կարող եք արտահայտել այնտեղ:
Լուսանկարը` Associated Press-ի:
