ԵՊՀ ինֆորմատիկայի և կիրառական մաթեմատիկայի ֆակուլտետի դեկան Վահրամ Դումանյանի մեկնաբանությամբ՝ այն վարձավճարը, որ սահմանված է այսօր թե՛ պետության, թե՛ բուհերի կողմից, առնչություն չունի ուսման գների հետ, քանի որ ուսման գները իրականում 10-20 անգամ ավելի թանկ արժեն: Սակայն այդ դեպքում էլ հարց է առաջանում՝ ինչպե՞ս վճարել այդ վարձը:
Բանախոսն առաջարկեց, որպեսզի դասախոսներն ու ուսանողները համախմբվեն և միասնաբար քննարկեն այս խնդիրը, քանի որ այսօր շատ դասախոսներ ունեն ուսանող երեխաներ. «Գիտությունների թեկնածու դասախոսն այսօր ստանում է 150 հազար 7 հարյուր դրամ, որից հարկեր են գանձվում: Այդ դասախոսը 120 հազար դրամով կարո՞ղ է ընտանիք կազմել կամ ընտանիք պահել»:
Նրա խոսքով՝ այսօր դասախոսները ստանում են զրո տոկոս աշխատավարձ և նույն վիճակում են, ինչ ուսանողների ծնողները. «Ես պատրաստ եմ և կոչ եմ անում խոսենք՝ որպես հայ քաղաքացի, հասկանանք, թե ինչ ենք ուզում, քանի որ այս ձևով պայքարելը սեպ է խրում ուսանողի և դասախոսի միջև»:
Նա նշեց, որ համալսարանը հիմնարկ է և հարկատու է՝ ինչպես մյուս կառույցները, և լավագույն կադրերին չի կարողանում պահել միայն նրա համար, որ աշխատավարձերը ցածր են:
