Ազգային անվտանգության հարցերով ԱՄՆ նախագահի նախկին խորհրդական Մայքլ Ֆլինը եկամուտների մասին նոր հայտարարագրում հաստատել է տեղեկությունը Russia Today-ից 45 հազար դոլարի ստացման մասին՝ ելույթի համար, որն արտասանվել էր 2015 թվականին ռուսական իշխանամետ հեռուստաալիքի կողմից կազմակերպված համաժողովում։
Ավելի վաղ այդ գումարի մասին հայտնել էր Ներկայացուցիչների պալատի՝ վերահսկման և կառավարական բարեփոխման հարցերով կոմիտեն։
Ինչպես հայտնում են ամերիկյան ԶԼՄ-ները, առաջին ֆինանսական հաշվետվությունում, որը ներկայացրել էր Ֆլինը փետրվարին՝ իր հրաժարականից մի քանի օր առաջ, այդ տվյալները բացակայել են։
Շաբաթ հրապարակված նոր փաստաթղթերում նախկին խորհրդականը նաև հայտնում է պարգևավճարների և հոնորարների ստացման մասին՝ ռուսական բեռնատար ավիափոխադրող «Վոլգա-Դնեպրի» և «Կասպերսկու լաբորատորիայի» ամերիկյան դուստր ընկերության հետ համագործակցության դիմաց։
Համաձայն փաստաթղթերի՝ ընդհանուր առմամբ անցած տարի նախկին խորհրդականն աշխատել է 1.3 մլն դոլար։
