Փակ շուկայի շուրջ ծավալվող իրադարձությունների շուրջ այսօր հրավիրված ասուլիսում ճարտարապետ Սաշուր Քալաշյանը կրկին նշեց, որ կատարվել է մի բան, որը հակասում է մեր օրենսդրական դաշտին և ազգային դիմագծին: Նա ասաց, որ Փակ շուկայում տարվող շինարարական աշխատանքների համար սեփականատերը երկու անգամ տուգանվել է, սակայն այդպես էլ չի դադարեցրել շինարարությունը. «Մենք պահանջում ենք, որ սեփականատերը զրկվի սեփականության իրավունքից, հանրությանը վերադարձնի հուշարձանի նախկին տեսքը»:
Սաշուր Քալաշյանն ասաց, որ իրենք դիմել են նախագահին, վարչապետին, դատախազությանը, սակայն ոչ մի պատասխան չեն ստացել. «Նախնական թույլտվության համաձայն՝ ստորգետնյա մասում միայն ավտոկայանատեղի պիտի կառուցվեր, որի փոխարեն կառուցել են նաև այլ ապօրինի շինություն»:
Ասուլիսի մյուս բանախոսը՝ «Ես» ամսագրի գլխավոր խմբագիր Անի Քոչարն էլ հավելեց, որ պայքարը շարունակվելու է՝ անկախ կեղծ ու շինծու բեմադրությունից, անկախ օրինազանց անհատներից. «Մենք գիտենք, որ մի մարդ է այս երկրում իր վերջնական խոսքն ասում և կպայքարենք այնքան ժամանակ, մինչև նա ասի՝ «սիրուն չի»:
Ասուլիսին ներկա էր նաև Հայաստանի սոցիալիստական շարժման ղեկավար Ռոբերտ Ահարոնյանը, ով հարց բարձրացրեց. «Որտե՞ղ էիք դուք, որ «Սևան» հյուրանոցն ու Երիտասարդական պալատն էին քանդում: Միակ անձը, որ իրավունք ունի պայքարելու, ես եմ: Երբ Լենինի արձանն էին հանում, ես պառկել եմ հուշարձանի առաջ, սակայն մյուս հուշարձանների համար ոչինչ չարեցիք: Ֆասադը չի քանդվել, քսան տարի այդ շուկայում 15-20 մարդ էր աշխատում, դվայնոյ-տրայնոյ թիվ ուներ այդ շուկան»:
Նա բարկացած ասաց, որ մի գործարար է մնացել Հայաստանում, ուզում եք, որ նա է՞լ թողնի, գնա:
Երկար բանավեճի արդյունքում կողմերն այդպես էլ ընդհանուր եզրակացության չեկան. սոցիալիստը մնաց իր այն կարծիքին, որ Փակ շուկան քանդվում էր, իսկ Սամվել Ալեքսանյանը այն փրկել է ոչնչացումից, ինչպես նաև մեծ թվով աշխատատեղեր ստեղծել:
