Հայաստանի քաղաքագետների միության նախագահ Հմայակ Հովհաննիսյանի կարծիքով, համաներմամբ քաղբանտարկյալներին ազատ արձակելու փաստը խեղաթյուրվում է իշխանության ներկայացուցիչների կողմից։
«Սերժ Սարգսյանի մանկլավիկները պնդում են, թե Սասունի և Նիկոլի ազատման համար պատճառներն են նախ՝ իշխանության մեծահոգությունը, ապա՝ ընդդիմության ճնշումները և միջազգային հանրության հորդորները։ Մինչդեռ քաղբանտարկյալներն ազատ են արձակվում, որովհետև Սերժ Սարգսյանը ձախողվեց սոցիալ- տնտեսական քաղաքականության մեջ»,- ասում է Հմայակ Հովհաննիսյանը։ Ըստ քաղաքագետի՝ երկրում տիրող և իր գագաթնակետին հասած սոցիալական դժգոհությունն է ստիպում իշխանությանը քաղբանտարկյալներին ազատ արձակել։
«Ի՞նչ փոփոխություններ կարձանագրվեն քաղաքական կյանքում և հասարակության մեջ Սասունի և Նիկոլի ազատարձակմամբ» հարցին Հմայակ Հովհաննիսյանը պատասխանեց. «Հասարակությունը քաղբանտարկյալների ազատարձակման հետ կապում է հույս ոչ թե՝ որ ընդդիմության և իշխանության միջև, ի վերջո, կսկսվի երկխոսություն, այլ ընդհակառակը, որ դրանից հետո ընդդիմության պայքարը ավելի կհզորանա, ավելի ակտիվ և անկաշկանդ կդառնա»։
Ըստ Հովհաննիսյանի՝ քաղբանտարկյալների ազատումից հետո առաջացած հանդարտված կրքերի և պասսիվության պայմաններում ՀԱԿ-ի համար նոր ակտիվության և նոր հաջողությունների «փրկօղակ» կարող է հանդիսանալ արտահերթ ընտրությունների պահանջը։
