Անդրադառնալով ռուս-թուրքական բանակցություններին, օրերս Մոսկվայում կայացած Պուտինի և Էրդողանի հանդիպմանը, «Առաջին լրատվական»- ի հետ զրույցում արևելագետ Վահրամ Տեր-Մաթևոսյանը նշեց, որ դեռ վաղ է ռուս-թուրքական հարաբերությունների կարգավորման մասին խոսելը, դեռ վաղ է նախաճգնաժամային հարաբերությունների մասին անգամ ակնարկելը, որվհետև դեռ կան բավական մեծ թվով հակասություններ:
Այն տպավորությունը, որ երեկ Պուտինը և Էրդողանը փորձում էին թողնել համաշխարհային հանարության մոտ, որ հարաբերություններն ինտենսիվորեն կարգավորվում են, կարծում եմ իրականում այնքան էլ այդպես չէ. դրա առաջին վկայությունն այն է, որ եթե դիտարկենք, թե ինչ փաստաթղթեր են ստորագրվել կամ բանակցություններում ինչի վրա է շեշտադրում կատարվել, կտեսնենք, որ հիմնականում տնտեսական, առևտրային, մշակութային բնույթի շեշտադրումներ են, ինչը չի նշանակում, որ Սիրիական ճգնաժամը և Ռուսաստանի ու Թուրքիայի միջև առկա հակասությունները չեն քննարկվել:
Անդրադառնալով հարցին, թե Ռուսաստանի հետ հարաբերությունները կարգավորելով, հնարավո՞ր է, որ Թուրքիան ավելի ակտիվորեն փորձի ներգրավվել Ղարաբաղյան խնդրի կարգավորման գործընթացում, Վահրամ Տեր-Մաթևոսյանը նշեց, որ Թուրքիան միշտ է դա ցանկացել, սակայն ցանկությունը և իրականությունը չեն համընկել: «Թուրքիան 91թ-ից փորձել է բանակցությունների մաս կազմել, ինչը չի ստացվել և չի էլ ստացվի, որովհետև Թուրքիան միակողմանիորեն Ադրբեջանի շահերն է պաշտպանում, ինչը չի բխում Հայաստանի շահերից»,- նշեց արևելագետը՝ հավելելով, որ Հայաստանը պետք է ամեն ինչ անի, որպեսզի բացառի Թուրքիայի ներգրավումն այս հարցում:
Տեր-Մաթևոսյանի կարծիքով՝ եթե իսկապես Թուրքիան հետաքրքրված է Հարավային Կովկասում խաղաղության և անվտանգության հարցով, ապա կարող է ազդել Ադրբեջանի վրա, որպեսզի վերջինս կառուցողական լինի և վերադառնա բանակցությունների սեղանի շուրջ:
Մանրմասները՝ տեսանյութում: