Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Հունաստանի Կորնթոս քաղաքի քաղաքապետ Նիկոլաոս Ստավրելիսին։ Այս մասին հաղորդագրություն է տարածել Հունաստանում Հայաստանի դեսպանության «Ֆեյսբուք»-ի էջը։
Նշում է, որ հանդիպման ընթացքում դեսպան Մկրտչյանը ներկայացրել է ՀՀ դեսպանության գործունեության հիմնական ուղղությունները, քաղաքական ակտիվ երկխոսության ընթացքը, կրթական, մշակութային ոլորտներում իրականացվող միջոցառումները, հայ-հունական հարաբերությունների ներկա բարձր մակարդակը։ Այս համատեքստում դեսպանը հիշատակել է Կորնթոսում դեռ 19-րդ դարի վերջերից հայ գաղթականների ներկայության, Կորնթոսի ջրանցքի աշխատանքներում նրանց ունեցած էական ներդրման մասին։ Նաև խոսք է գնացել 1922 թ․ Զմյուռնիայի մեծ աղետից հետո հազարավոր հայերին Կորնթոսում ապաստան տրամադրելու վերաբերյալ։
«Զրուցակիցներն ընդգծել են կրթության և մշակույթի ոլորտում համագործակցության կարևորությունը՝ որպես հայ-հունական երկկողմ հարաբերությունների զարգացման ներուժով օժտված բնագավառ։ Այս առումով կարևորվել է երկու երկրների քաղաքների միջև համագործակցության հաստատման հնարավորությունը, ինչը կնպաստի մշակութային և կրթական, ինչպես նաև զբոսաշրջային ծրագրերի զարգացմանը։
Կողմերը համաձայնել են մոտակա ժամանակներս փոխադարձ այցեր կազմակերպել՝ մի շարք ոլորտներում համագործակցության հնարավորությունները դիտարկելու նպատակով»,- ասված է հաղորդագրության մեջ։
