«Առանց կռվի հնարավոր չի էս ղեկավարությանը կտրել, չի լինի, արյամբ պիտի գրավենք: Մենք կմեռնենք, մեր էրեխեքն էլ նույն ձևով՝ սենց, քանի որ էդ կուսակցապետերդ չեք միանում իրար։ Երևանը եթե պայքարում ա, մենակ իրա քաղաքի համար, մեզ համար չի մտածում, ոչ մի արդյունքի չենք հասնելու: Մի հատ Երևան ա Հայաստանում, ու դուք էլ ընդեղ եք ապրում, չեք մտածում մեր մասին: Սուտ ա էս լրիվ զրիցները, սուտ ա: Մի հատ կռիվ ա պետք, զենք բաժանեք, էդ ա պետք, ուրիշ ոչ մի բան։ Խոսում-խոսում ենք, բայց կներեք, ռեալ չի ներդրվում»,- այսպիսի խոսքերով այսօր Վանաձորի Շառլ Ազնավուրի մշակույթի պալատի բակում վանաձորցիները դիմեցին Րաֆֆի Հովհաննիսյանին, ում ամիսներ առաջ ընտրել էին երկրի նախագահ:
Ի դեպ, «Ժառանգության» առաջնորդի հետ վանաձորցիների հավաքն այսօր սակավամարդ էր` նրա նախընտրական և հետընտրական հանդիպումների համեմատությամբ:
Պատասխանելով վանաձորցիներին` Րաֆֆի Հովհաննիսյանը նշեց, սակայն, որ չի խոստացել նրանց ակնթարթային փոփոխություններ: «Մինչ ընտրական շրջանի հիշո՞ւմ եք մեր հավաքը հենց այս դահլիճում, որտեղ Վանաձորի և Լոռիի ժողովուրդը ասավ, որ այո՛, ուզում ենք փոփոխություն, այո՛, ուզում ենք նոր Հայաստան, այո՛, ուզում ենք իրավունք և աշխատատեղ, և արժանապատվություն, և ուզում ենք իրական կյանքում։ Ես այդ հանձնառությունը վերցրեցի ձեր առաջ, որ պարտավոր ենք տեսնել այդ օրը, բայց մի բան կա, որ ես խոսք չարեցի, և դա այն է, որ մի օրով մի ակնթարթով, մի մարդով է լինում: Սա պայքար է՝ տևական»,- նշեց Րաֆֆի Հովհաննիսյանը:
Նրա համոզմամբ` պայքարը հաղթանակել է, և դրա արտահայտությունն այսօր երիտասարդների ու ազատամարտիկների` իրենց արժանապատվության ու արդարության համար բարձրացվող պահանջներն են:
«Էլի պիտի փոխենք, էսպես չենք թողնելու մեր երկիրը, բայց ինչու մինչև վերջ չտարանք, այդ մինչև վերջը գալու է, բայց այդ մինչև վերջը չի լինելու մեր երեխաների կյանքի գնով։ Ուրիշ ձևով ենք փոխելու: Ես մի շաբաթ առաջ Ազատության հրապարակում առաջարկեցի, որ ամեն մեկը թող հաղթահարի իր սեփական եսը, կուսակցականությունը, քաղաքացիականությունը, հասկանա, որ ժողովուրդը 80-ը 20-ի դիմաց փետրվար 18-ին փոփոխության համար քվեարկեց:
Փետրվարի 18-ին և ոչ մեկը չէր հավատում` ո՛չ քաղաքական ուժեր, ո՛չ սփյուռք, ո՛չ օտար պետություններ, ո՛չ Ռուսաստան, ո՛չ Ամերիկա, ո՛չ Եվրոպա։ Ժողովուրդը ընտրեց փոփոխություն, դա փաստ է, և բոլորը գիտեն, Սարգսյան Սերժը գիտի, մարզպետները, քաղաքապետերը, հրամանատարները, օտար նախագահները գիտեն, որ հայ ժողովուրդը համարում է, որ այս իշխանությունը օրենքից դուրս է: Ես դա չեմ կարող փոխել, որ իրենք գողացան ընտրությունը։ Մենք չունեցանք այն անհրաժեշտ կազմակերպվածությունը։ Որովհետև իմ թեկնածությունը ոչ թե կուսակցական էր, այլ քաղաքացիական էր, չունեի քաղաքացիական զանգվածը` կուսակցությունները, քաղաքացիական նախաձեռնությունները, որոնք այսօր շատ ակտիվ են, բայց ապրիլի 9-ին չունեինք քաղաքացիական զանգվածը, պաշարը, չկար քվեն ի կատար ածելու ներուժը: Ապրիլի 9-ին պիտի զոհ չտայինք և զոհ չտվեցինք»,- իր ելույթում նշեց Րաֆֆի Հովհաննիսյանը:
