Սեպտեմբերի 2-ից բոլոր ուսանողները հրավիրվում են առճակատման՝ ուսման վարձավճարների թանկացման դեմ: «Առաջին լրատվական»-ի հաղորդմամբ` օգոստոսի 29-ին Ազատության հրապարակում ազատամարտիկների հրավիրած հանրահավաքի ժամանակ նման կոչով հանդես եկավ Ուսանողական շարժման անդամ, ԵՊՀ ուսանող Հարություն Մկրտչյանը:
«Այս թափթփուկներին պիտի ստիպենք չեղյալ համարել որոշումը: Այս իրավիճակում երկու ելք կա` արտագաղթ կամ պայքար։ Ես ընտրել եմ պայքարի ճանապարհը: Սա իմ պապական պետությունն է, ես կստիպեմ արտագաղթել, բայց ինքս չեմ արտագաղթի»,- ասաց նա` նշելով, որ ԵՊՀ-ից սկիզբ կդրվի ուսանողական շարժման նոր փուլին: Հ. Մկրտչյանը շեշտեց, որ իրենք փորձել են բոլոր օրինական ճանապարհներով անցնել, իրենց չեն հասկացել, ուրեմն պիտի ներեն. իրենք բավական երկար ժամանակ խոհեմ եղան: Ուսանողների պահանջը մեկն է. «Մի հարստացեք մեր կրթության հաշվին»:
