«Մարտի 1-ն իրականում» խորագրով քննարկում-հանդիպման ժամանակ «Ալիք մեդիա» լրատվականի գլխավոր խմբագիր Արսեն Խառատյանը կարծիք հայտնեց, որ բոլոր հարթակներում անհրաժեշտ է խոսել այն մասին, որ Երևանում պետք է լինի մարտի 1-ի զոհերի հիշատակի հուշարձան, որպեսզի փողոցով անցնող երեխան ծնողին հարցնի՝ սա ինչ է, ծնողները պատմեն դրա մասին։
«Մարտի 1» ՀԿ համակարգող Առաքել Սեմիրջյանը կարծիք հայտնեց, որ մարտի 1-ից հետևություններ արվել են. «Ինձ համար գոյություն ունի մարտի 1-ից առաջ ու հետո Հայաստան։ Այսօր ապրում ենք ավելի բացահայտված Հայաստանում։ Նույն հուլիսյան Սարի թաղի դեպքերի ժամանակ, փառք աստծո, որևէ զոհ չեղավ, այն դեպքում, երբ զինված տղաներ էին այնտեղ։ Ես տեսնում եմ, որ մարտի 1-ին զոհված տղաների կյանքի գնով այսօր Հայաստանում իրավիճակ է փոխվել»:
«Մարտի 1-ի» գործով «Փաստահավաք խմբի» անդամ փաստաբան Սեդա Սաֆարյանն անդրադառնալով խմբի գործունեության դադարին՝ նշեց, որ ձախողումները պայմանավորված էին իրենց միջև առկա անվստահության և նպատակների միասնության բացակայությամբ. «Որքան էլ փորձեցինք փաստեր հավաքել, դրանց ճակատագիրը մինչև հիմա անհայտ մնաց, սակայն որոշակի պատկեր կարողացանք ստեղծել։ Փասատահավաք խումբն ավելի կարող էր անել, սպառված չէր, աշխատելու հնարավորությունը»։
Մարտի 1-ի զոհ Գոռ Քլոյանի հայրը` Սարգիս Քլոյանը, ով նույնպես մասնակցում էր քննարկմանը, նշեց. «Մարտի 1-ն ինձ ու իմ ընտանիքի համար սև գարուն է։ Խոստացան, որ կբացահայեն, ով է սպանել իմ տղային, բայց մինչև հիմա գործը մնում է չբացահայտված։ Հավատում եմ, որ կգա ժամանակ ու անպայման մեղավորները կպատժվեն»։
«Անձնական ողբերգությունից մինչև կոլեկտիվ ողբերգություն է մարտի 1-ը, բայց սրանից զատ պետք է վերաիմաստավորել, որ սա մեր ժողովրդի, կամքի, ազատության, պայքարի օրն է։ Մարտի 1-ը պետք է լինի ոչ աշխատանքային օր, բայց ոչ թե սգո, այլև ազատության համար պայքարի օր»,- եզրափակեց Արսեն Խառատյանը:
Մանրամասները՝ տեսանյութում:
