Արարատի և Վայոց Ձորի մարզերի ընդհանուր իրավասության դատարանի Մասիսի նստավայրում Թաթուլ Պողոսյանի նախագահությամբ ընթանում է Թովմաս Վարդանյանի գործի դատավարությունը:
Դատարանը բավարարել է ամբաստանյալի շահերի պաշտպան Հ. Պետրոսյանի միջնորդությունը և գործով նշանակել է կրկնակի հանձնաժողովային ստացիոնար դատահոգեբուժական փորձաքննություն:
20-ամյա Թովմասն աշխատում էր սրճարանում: Նույն սրճարանում էր աշխատում նաև Գետափնյա գյուղի բնակչուհի Հայկանուշը, ումից Թովմասը պարտքով 100 հազար դրամ էր վերցրել:
Նախաքննական մարմինը Թովմասին մեղադրանք է առաջադրել ծանրացուցիչ հանգամանքներում սպանության փորձ կատարելու համար՝ ՀՀ քրեական օրենսգրքի 34-104 հոդվածի 2-րդ մասի 8-րդ կետով այն բանի համար, որ Հայկանուշից վերցրած 100 հազար դրամ պարտքը վերջինիս պահանջից հետո չվերադարձնելու, նյութական օգուտ ստանալու ձգտումով ցանկացել էր սպանել պարտատիրոջը:
2013 թվականի հունվարի 21-ին Թովմասը Հայկանուշին առաջարկել է աշխատանքի ավարտից հետո միասին գնալ Ազատաշեն գյուղում բնակվող իր ընկերոջ տուն՝ գումարը վերցնելու: Հայկանուշը ոչինչ չի կասկածել, վստահել է նրան ու գնացել:
Ժամը 22-ի սահմաններում Ազատաշեն-Արբաթ ավտոճանապարհի ձախ մասում գտնվող դաշտում, նախապես իր հետ վերցրած, պայուսակում պահած ուրագով Թովմասը բազմաթիվ հարվածներ է հասցրել Հայկանուշի գլխի շրջանին, պատճառել կյանքին վտանգ սպառնացող ծանր վնաս: Տեսնելով, որ, չնայած գործադրած ջանքերին, չի կարողանում սպանել Հայկանուշին, Թովմասը ձեռքերով փակել է նրա շնչառական ուղիները, փորձել է շնչահեղձ անել: Հայկանուշն ուշագնաց է եղել: Թովմասը կարծելով, թե վերջապես սպանել է կնոջը՝ հեռացել է դեպքի վայրից:
2013 թվականի հունվարի 24-ին Թովմաս Վարդանյանը Մասիսի քննչական բաժանմունքի քննիչի կողմից ներգրավվել է որպես հարուցված քրեական գործով մեղադրյալ:
Հունվարի 25-ին նա դատարանի որոշմամբ տեղավորվել է «Նուբարաշեն» հոգեբուժական հիվանդանոցի դատահոգեբուժական փորձաքննությունների բաժնում՝ դատահոգեբուժական ստացիոնար փորձաքննության ենթարկվելու համար:
Հանձնաժողովի կողմից 2013 թվականի փետրվարի 21-ին տրված եզրակացության համաձայն՝ Թովմաս Վարդանյանը ճանաչվել է մեղսունակ: Հաշվի առնելով նրա մոտ առկա խանգարումները՝ մասնագետները խորհուրդ են տվել, որ Վարդանյանը գտնվի նյարդահոգեբույժի հսկողության տակ:
Սակայն հուլիսի 25-ին Վարդանյանի շահերի պաշտպանը միջնորդություն է ներկայացրել դատարան՝ իր պաշտպանյալի նկատմամբ կրկնակի հանձնաժողովային դատահոգեբուժական ստացիոնար փորձաքննություն նշանակելու մասին՝ պատճառաբանելով, որ նախորդ փորձաքննության եզրակացությունը կասկածներ է հարուցում:
Փորձաքննվողի մոտ ի հայտ բերված խանգարումների պատճառով նա ժամանակին ազատվել էր պարտադիր զինվորական ծառայությունից:
Ըստ պաշտպանի՝ Թովմասը չի հիշում կատարած հանցանքը, դրա հետևանքները, նրա առողջական վիճակը դատական քննության ընթացքում ավելի է վատացել:
Դատարանը նկատի է առել, որ ամբաստանյալ Թովմաս Վարդանյանը դատարանում իրեն մեղավոր չի ճանաչել, հայտնել է, թե մեղսագրվող դեպքի հանգամանքներն ընդհանրապես չի հիշում: Նման պահվածքը դատարանի մոտ կասկածներ է հարուցել ամբաստանյալի հոգեկան վիճակի լիարժեքության վերաբերյալ, բացի այդ, նախկին փորձաքննության ժամանակ փորձագետներին հարցադրում չէր արվել «ամնեզիայի» առկայության վերաբերյալ: Ընդհանուր իրավասության դատարանը որոշել է, որ Թովմաս Վարդանյանի նկատմամբ կրկնակի դատահոգեբուժական փորձաքննության անցկացումը պարտադիր է: