Վարչապետ Տիգրան Սարգսյանն այսօր ԱԺ-ում 2010 թ. բյուջեի կատարողականի վերաբերյալ կառավարության հաշվետվությունը ներկայացնելիս անդրադարձավ նաև ԱԺ-ում Վերահսկիչ պալատի երեկ ներկայացրած հաշվետվությանը. «Ցավոք, մենք չենք օգտվել հարակից զեկույցով հանդես գալու մեր իրավունքից: Մեղավորները կպատժվեն, որ մեզ տեղյակ չեն պահել, որ մենք այդ իրավունքից օգտվենք, քանի որ մենք չափազանց կարևորում ենք Վերահսկիչ պալատի կողմից կատարված աշխատանքները և այն բացահայտումները, որոնք առկա են»,- ասաց Տ. Սարգսյանը։
Նրա խոսքով՝ Սոցիալական ապահովության պետական ծառայության վճարման ծառայությունը լուծարելու արդյունքում էր, որ «սկսվեցին փուլ առ փուլ բացահայտվել բոլոր կոռուպցիոն երևույթները»: «Երևան քաղաքի արդյունքներն ամփոփված և ներկայացված են դատախազություն. 500 էջից ավելի փաստաթղթեր են, որտեղ բացահայտված են այս բոլոր երևույթները։ Մենք 3 ամսվա ընթացքում պետք է ամփոփենք ստեղծված իրավիճակը: Խոսքն առաջին փուլում գնում է թոշակների վճարումների մասին, երկրորդ փուլում՝ սոցիալական նպաստների մասին: Այսօր արդեն իսկ ՀՀ աշխատանքի և սոցիալական հարցերի նախարարության կողմից կատարված աշխատանքների շնորհիվ էապես պարզեցվել են սոցիալապես անապահով ընտանիքների թիրախային խմբերի ընտրության ցուցանիշները, պարզեցվել է բյուրոկրատիան, որի արդյունքում 105 հազար ընտանիքներից ցուցանիշը հասցվել է 95 հազարի այն պարզ պատճառով, որ բացահայտվել են բազմաթիվ կեղծարարություններ փաստաթղթերի ներկայացման պարագայում:
Ընդհանուր առմամբ մենք դրական ենք գնահատում մեր համագործակցությունը Վերահսկիչ պալատի հետ. բոլոր հաշվետվությունները քննարկվում են, և Վերահսկիչ պալատի կողմից ներկայացված առաջարկությունները դառնում են կառավարության քննարկման առարկա: Մասնավորապես, կառավարության երեկվա նիստում Վերահսկիչ պալատի հետ համատեղ քննարկումների արդյունքում տրվել են համապատասխան հանձնարարականներ, և մենք փոխում ենք գործընթացները Համաշխարհային բանկի հետ վարկային ծրագրերի աշխատանքի առումով, մասնավորապես` ինչպես ենք ներկայացնում հայտեր տեխնիկական օժանդակության առումով, երբ վարկերի հաշվին մեր պետությունն ստանում էր տարբեր տիպի խորհրդատվություններ: Այսուհետև մենք դա պետք է ընդհանրապես բացառենք:
Երկրորդը` հանձնաժողովները, որ ստեղծվում են Հայաստանի Հանրապետությունում, որոնք հայտարարում են տենդերներ, որոնք սահմանում են որակական չափանիշներ, պատասխանատու են լինելու ոչ միայն ընթացիկ գործառույթներին հետևելու, այլև բովանդակության համար, որը նույնպես կարևոր երևույթ է: Եվ հետվարկային ծրագրերի իրականացման առումով մենք մտադիր ենք ներդնել պարտադիր աուդիտի անցկացման պահանջը, որպեսզի այդ ծրագրերն իրականացնողներն իմանան, որ հրապարակային քննարկվելու է ծրագրերի արդյունավետությունը:
Համենայնդեպս, մենք արձանագրում ենք, որ Վերահսկիչ պալատի կողմից կատարվող ստուգումների արդյունքների հիման վրա ընդունված որոշումները Հայաստանի Հանրապետությունում էապես կրճատում են կոռուպցիոն ռիսկերը: Միևնույն ժամանակ ուզում եմ նշել, որ, իհարկե, կան բազմաթիվ կետեր, որոնք վիճահարույց են, և մենք այդ բանավեճը շարունակում ենք Վերահսկիչ պալատի հետ, քանի որ դեռևս գտնված չեն լուծումներ, որոնք կբավարարեն նաև գործադիր իշխանությանը՝ այս կամ այն գործառույթը կանոնակարգելու տեսակետից»,- նշեց վարչապետը: