Սերժ Սարգսյանի ԵԿՄ համագումարյան ելույթը ակնհայտորեն կարելի է որակել որպես մարտակոչ, որը, սակայն, երկրապահներին ուղղվում է ոչ թե արտաքին թշնամուց պաշտպանվելու համար, այլ ներքին մարտահրավերներին դիմագրավելու համար:
«Այսօր Հայաստանը կանգնած է լուրջ վերափոխման շեմին, մենք իրականացնում ենք խորհրդարանական կառավարմանն անցնելու գործընթաց: Մենք պարտավոր ենք այդ անցումն անցկացնել անցնցում, պարտավոր ենք երաշխավորել կայունություն, օրինականություն: ՀՀԿ-ն գալիք ընտրություններին ներկայանում է պինդ թիմով, գործիչներով, ովքեր ժողովրդի քվեն ստանալու դեպքում պատրաստ են լինելու Մոսկվայից, Բրյուսելից, Վաշինգտոնից և բոլոր հնարավոր այլ ամբիոններից ու հարթակներից տեղ հասցնել Հայաստանի ձայնը, նրանք պատրաստ են լինելու ամենօրյա աշխատանքով Սահմանադրությունը կյանք դարձնել, իրենց հավատամքը ցանկացած բանավեճում առաջ տանել: Նրանք մարդկանց չեն խաբելու, չեն ասելու, որ մեկ տարի հետո Հայաստանը դարձնելու են դրախտ, չեն ասելու, որ ժողովրդի գազն ու հոսանքն անվճար է դառնալու, չեն ասելու, որ երիտասարդներին բանակ չեն տանելու, նրանք անելու են այն, ինչ ի վիճակի են, ամեն օր մեր երկիրն առաջ տանելու համար»»,- հայտարարել է Սերժ Սարգսյանը:
Այլ կերպ ասած, Սերժ Սարգսյանը ներքին խնդիրները լուծելու հարցում դիմում է ԵԿՄ-ի օգնությանը: Եվ սա հատկապես հատկանշական է այն իրողության պարագայում, որ ԵԿՄ համագումարին զուգահեռ նախօրեին տեղի էր ունենում նաև Օհանյան-Րաֆֆի-Օսկանյան նորաստեղծ դաշինքի մամլո ասուլիսը։ Այս դաշինքը չի թաքցնում, որ հույս ունի իր կողմ քաշել բանակն ու զինվորականությունը։ Իհարկե երեկվա ասուլիսում Սեյրան Օհանյանն ասում էր, որ Սերժ Սարգսյանի հետ անձնական խնդիր չունի, վստահության հարց չդրեց՝ Սերժ Սարգսյանին կրկին անուղղակի դարձնելով անձեռնամխելի, սակայն մյուս բանախոսները՝ Ժառանգություն կուսակցության վարչության փոխնախագահ Արմեն Մարտիրոսյանը, և «Համախմբում» կուսակցության նախագահ, ՀՀ ԱԳ նախկին նախարրա Վարդան Օսկանյանը ոչ մեկ անգամ հնչեցրել են իրենց հռչակած դաշինքի շուրջ համախմբվելու կոչեր, որոնց ենթատեքստում եղել է Սարգսյանի ոտքի տակի հողը թուլացնելու մարտավարությունը: Իսկ այս ամենին դիմագրավելու այլ փաստարկ, քան ուժային ռեսուրսները, Սերժ Սարգսյանը չունի:
Նա իր տնտեսական քաղաքականությամբ կատարելապես տապալվել է, նա տապալել է նաև ներիշխանական ֆորմացիայի գործընթացը և չի կարողացել ձևավորել իշխանություն, որում կունենար անսասան հեղինակություն և ազդեցություն: Այսինքն՝ Սերժ Սարգսյանը նախագահության ավելի քան 6 տարիների ընթացքում չի կարողացել լուծել որևէ տնտեսական և քաղաքական խնդիր: Միակ խնդիրը, որ նա լուծել է, ըստ էության, «բաժանիր, որ տիրես» սկզբունքով ներիշխանական և ներհամակարգային շահերի բախում առաջացնելն է, որը, սակայն, կառավարման հարցում օգտակար է նախագահությունը գլորելու իմաստով: Իշխանություն պահպանելու տեսանկյունից շահերի բախման վրա կառավարելու մարտավարությունը ոչ միայն անարդյունավետ է դառնում, այլ նաև ժամանակի ընթացքում կարող է դառնալ շատ վտանգավոր:
Այս իսկ պատճառով Սերժ Սարգսյանը ձեռնամուխ է լինում ուժային հենարանների ձևավորմանը, ներքին մարտահրավերներին դիմագրավելու համար, իր անձնական իշխանությունը ներքին մարտահրավերներից պաշտպանելու համար՝ ԵԿՄ-ի առաջ՝ ԵԿՄ և երիտասարդներ: ՀՀԿ նախընտրական ցուցակը դրա վառ վկայությունն է։ Երիտասարդներին ՀՀԿ-ն ակնհայտորեն արդեն նետել է մարտի և մենք տեսնում ենք, թե ինչպիսի քարտ բլանշ է տրված երիտհանրապետականներին։ Այս երիտասարդությունը միախառնված այսպես կոչված, փողոցային-թաղային ուժին կնետվի քաղաքացիական-երիտասարդական ընդդիմադիր ռեսուրսի դեմ: Իսկ ԵԿՄ-ն էլ, ըստ էության, դիտարկվում է որպես զինված ուժ, որը կկանգնի արդեն քաղաքական ռեսուրսի դեմ:
Այսօր ԵԿՄ նախագահ Մանվել Սարգսյանը դիմել է երկրի նախագահին: Նա մասնավորապես ասել է.
Հարգելի´ Սերժ Ազատի, մենք հավատում և վստահում ենք Ձեզ: ԵԿՄ-ն ակտիվորեն մասնակցել և մասնակցելու է համապետական ընտրություններին:
«Սիրելի զինակիցներ, խնդիրներին բոլորից լավ տեղյակ է Հայաստանի Հանրապետության նախագահ, զինված ուժերի գերագույն գլխավոր հրամանատար Սերժ Սարգսյանը: Մենք համոզված ենք, որ ջանք ու եռանդ չեք խնայում կառուցելու հզոր, զարգացած Հայաստան, որտեղ պաշտպանված կլինեն հայրենիքի սահմանները, և որտեղ բարեկեցիկ, խաղաղ կյանքով կապրի մեր ժողովուրդը: Դա է երկրապահներիս երազանքը: Մենք էլ աջակցում ենք Ձեր բոլոր նախաձեռնություններին: Երկրապահն ակտիվորեն մասնակցել և մասնակցելու է համապետական ընտրություններին: Երկրապահը չի կարող անտարբեր լինել երկրի, պետության, ազգի ճակատագրի հանդեպ: Ինքներս մեր ձեռքով պետք է մեր ճակատագիրը կերտենք, որ հետո ուրիշից չդժգոհենք»,- ասել է Մանվել Գրիգորյանը:
Դատելով ԵԿՄ նախագահ Մանվել Գրիգորյանի դիրքորոշումից և, այսպես ասած, պատասխան խոսքից, որի անունը 2008 թվականի փետրվարյան զարթոնքին վանկարկվում էր Ազատության հրապարակում, ԵԿՄ-ն ընդունում է Սերժ Սարգսյանի ուժային հենարանը լինելու հայտը:
Լուսանկարը՝ Photolure-ի
