Փետրվարի 10-ին տեղի ունեցավ ԲՀԿ համագումարը, որի ժամանակ ԲՀԿ երբեմնի առաջնորդ Գագիկ Ծառուկյանը ընտրվեց կուսակցության նախագահ, սակայն խոստացված հուշագրի ստորագրում այդպես էլ տեղի չունեցավ:
Հիշեցնենք, որ Գագիկ Ծառուկյանը, բացելով քաղաքականության մեջ փակած էջը, հայտարարեց լայն կոնսոլիդացիայով ընտրություններին մասնակցելու մասին:
Ըստ մեր տեղեկությունների՝ խաղաքարտերը փոխում է նախկին վարչապետ, նախկին ՀՀԿ-ական Հովիկ Աբրահամյանը, ում որդին՝ Արտաշատի քաղաքապետ Արգամ Աբրահամյանը, ըստ ամենայնի, ընտրություններին կմասնակցի «Ծառուկյան» դաշինքով: Ի դեպ, նա ներկա էր «Բարգավաճ Հայաստան» կուսակցության 9-րդ համագումարին և խոստացավ առաջիկայում հանդես գալ հայտարարությամբ:
ՎՍԴՀԿ ատենապետ Լյուդմիլա Սարգսյանը, ով ընտրություններին նպատակահարմար էր գտնում «Ծառուկյան» դաշինքով մասնակցել, «Առաջին լրատվական»-ի հետ զրույցում ասաց, որ Ծառուկյանի հետ հանդիպում տեղի չի ունեցել, հավանաբար քննարկումներ են. «Կարծում եմ՝ դժվար շրջան է, և այնքան էլ հեշտ չէ խնդիրները կարգավորել: Սպասենք երկու օր, ամեն ինչ հստակ կդառնա»,- ասաց նա:
ՎՍԴՀԿ-ն ընտրություններին չի մասնակցի, բայց կաջակցի Ծառուկյանին: Իսկ թե ինչու չստացվեց համագործակցել՝ Լյուդմիլա Սարգսյանը ասաց. «Չեմ կարող ասել, քանի որ այն տրամաբանությունը, որ տեսնում եմ այդ համագործակցության շրջանակներում, կարծես չի աշխատում: Եվ 10-15 օր առաջ ձեռք բերված նախնական պայմանավորվածությունները դաշինքի վերաբերյալ, դա էլ կարծես թե չի աշխատում»,- ասաց Լյուդմիլա Սարգսյանը՝ հավելելով, որ դաշինքով, թե առանց դաշինքի՝ Ծառուկյանի հնարավորություններն այս ընտրություններին նորից շատ բարձր է գնահատում:
Նրա խոսքով՝ Գագիկ Ծառուկյան անձին են տրվելու ձայները և ԲՀԿ-ին, հետևաբար լայն դաշինքը ավելի ծանրակշիռ էր դարձնելու թիմի գործոնը: «Եթե անգամ դաշինք չի ձևավորվում, կարծում եմ՝ Ծառուկյան Գագիկի վարկանիշն այնքան բարձր է, որ չեմ կարծում՝ մարդկանց տրամադրությունների մեջ որևէ բան փոխվել է: Ամենամեծ հնարավորությունները նորից ու նորից ունի Գագիկ Ծառուկյան դաշինքը կամ Գագիկ Ծառուկյան-ԲՀԿ-ն»,- հավելեց նա:
Ոչ միայն ՎՍԴՀԿ-ն, այլև շատ կուսակցություններ, որոնք ակնկալում էին այդ դաշինքում լինել և չեն լինելու, Լյուդմիլա Սարգսյանի դիտարկմամբ՝ առանձին մասնակցելու հնարավորություն չունեն, եթե այդ հնարավորությունը լիներ, 30 կուսակցություն կմասնակցեր ընտրություններին, և դաշինքներ չէին ձևավորվի:
Ավելի վաղ ՍՀԴԿ ատենապետ Նարեկ Գալստյանը հանդիպել էր Գագիկ Ծառուկյանին և մեզ հետ զրույցում նշել էր, որ ՍԴՀԿ-ն միանում է «Ծաոուկյան» դաշինքին: Մեր ունեցած տեղեկություններով՝ այս պահին անորոշ իրավիճակ է ՍԴՀԿ-ում, «Ծառուկյան» դաշինքի կողմից հայտարարված կոնսոլիդացիան չի կայանում: