Հայկական «Էյր Արմենիա» ավիաընկերության սեփականատեր Վահան Հարությունյանը «Առաջին լրատվական»-ի հետ զրույցում ասաց, որ իրենց առաջիկա չվերթերի դեպքում նույնպես ավիասնունդը մատակարարելու է նույն «Ավիասերվիս» ընկերությունը:
Հիշեցնենք, որ «Ավիասերվիսը» պատկանում է «Բարգավաճ Հայաստան» կուսակցության նախագահ Գագիկ Ծառուկյանին: Այն ունի մենաշնորհային կարգավիճակ և, եղած կարծիքների համաձայն, գերշահույթ է ապահովում սեփականատիրոջը: Եվ տարիներ շարունակ դժգոհություններ են եղել, թե ավիասնունդը բավականին թանկ է և գինը մտնելով ավիատոմսի արժեքի մեջ՝ թանկացնում է այն:
Փորձեցինք Վ.Հարությունյանից ճշտել, թե «Ավիասերվիսն» իրենց ընկերությանն ի՞նչ սակագներով է սնունդ մատակարարելու: Վ.Հարությունյանը չցանկացավ նշել, թե իրենց տոմսերի արժեքի մեջ որքան գումար է կազմելու Գ.Ծառուկյանին պատկանող ընկերության ավիասնունդը:
«Զվարթնոց» օդանավակայանում ներկայումս ավիասնունդ մատակարարող միակ ընկերությունը «Ավիասերվիսն» է, այլ օդանավակայաններում՝ համապատասխանաբար այլ ընկերությունները: Ավիասննդի արժեքը բնականաբար մտնում է ավիատոմսի արժեքի մեջ և կախված է այն բաղադրիչներից, որը պատվիրվում է: Ես կարող եմ ասել, որ նրանց սակագները համահունչ են ընդհանրապես այլ կազմակերպությունների կողմից կիրառվող սակագների հետ, էական տարբերություն չկա»,- ընդամենը ասաց Վ.Հարությունյանը:
Ի դեպ, նախկինում բավականին մեծ դժգոհություն է եղել նաև «Զվարթնոց» օդանավակայանի սպասարկման սակագների առնչությամբ: ՀՀ միակ ավիափոխադրող «Արմավիա» ընկերությունը երկար ժամանակ «Զվարթնոցի» հետ ֆինանսական խնդիրներ է ունեցել: «Զվարթնոցը» դժգոհում էր, որ «Արմավիան» չի վճարում իր սպասարկման ծառայությունների դիմաց և մեծ պարտքեր է կուտակում, իսկ «Արմավիան» էլ դժգոհում էր, որ օդանավակայանի սպասարկման սակագները շատ բարձր են: Վ.Հարությունյանից փորձեցինք հետաքրքրվել, թե «Զվարթնոցը» «Էյր Արմենիայի» դեպքում ի՞նչ սակագներ է սահմանել: Արդյոք դրանք նո՞ւյնն են, ինչ «Արմավիայի» դեպքում, թե՞ տարբերվում են: Այս դեպքում նույնպես Վ.Հարությունյանը խուսափեց կոնկրետ պատասխան տալուց:
«Կարծում եմ, որ ընդհանուր առմամբ սակագները ուղղակիորեն կախված են չվերթերի և փոխադրումների այն ծավալներից, որ իրականացվում են օդանավակայանի միջոցով: Եվ դրանց աճի պարագայում կարելի է կատարել սակագների վերանայում: Իսկ ընդհանրապես, պետք է ասեմ, որ «Զվարթնոցի սակագները շատ ցածր չեն, բայց շատ չեն տարբերվում միջազգայնորեն կիրառվող սակագներից : Եվ մենք ակնկալում ենք, որ ժամանակի ընթացքում, փոխադրումների ծավալների աճին համապատասխան, դրանք կվերանայվեն և կնվազեցվեն»,- ասաց Վ.Հարությունյանը:
Վ.Հարությունյանի հետ ամբողջական հարցազրույցը կներկայացնենք ավելի ուշ:
