Նյու Յորքի ամենանեղ տունը, որը նախորդ ամսվա հունվարին վաճառվել էր 2.1 մլն դոլարով, կրկին դրվել է վաճառքի: Ինչպես գրում է The Daily Mail-ը, ներկա պահին նրա գինը տատանվում է 4.3 մլն դոլարի սահմաններում:
Գնի նման աճը պայմանավորված է նոր տիրոջ կողմից տանն իրականցված վերանորոգման աշխատանքներով։ Մասնավորապես՝ վերանորոգվել է հատակը, խոհանոցում սպիտակ կաղնուց կահույք է տեղադրվել, լոգարանը պատել են խճանկարով և իտալական մարմարով, ինչպես նաև՝ տանը տեղադրվել են ժամանակակից սարքվորումներ (օդափոխության և ջեռուցման նոր համակարգ, լվացքի մեքենաներ):
Մանհեթենի Գրինվիչ Վիլիջում գտնվող այս տան լայնությունը կազմում է 2.9 մ, իսկ դիմային մասից մինչև հետնամաս երկարությունը կազմում է 9.1 մետր: Այն կառուցվել է 1873 թ.-ին, որպեսզի փակվի երկու շենքերի միջնահատվածը, որը տանում էր դեպի տան ետնաբակում տեղակայված նախկին ձիարշավարանը:
Նախորդ դարի սկզբին այս շենքում եղել է հրուշակեղենի գործարան և կոշկակարների արհեստանոց: 1920-ական թվականներին այստեղ է ապրել հայտնի ամերիկուհի գրող Էդնա Սենթ Վինսենտ Միլլեյը: Տարբեր ժամանակներում այս տան բնակիչներն են եղել դերասաններ Քերի Գրանտ և Ջոն Բերիմորը, մուլտիպլիկատոր Ուիլիամ Սթայգը և մշակութաբան Մարգարեթ Միդը:
1950-ական թվականների շենքը գնել է իրավաբանների մի ընտանիք, որն էլ փաստորեն այն փրկել է քանդելուց, քանի որ հրաժարվել է տեղափոխվելուց, երբ քաղաքային իշխանությունները ցանակացել են ամբողջությամբ վերափոխել այդ շրջանը:
