Բրիտանական The Independent թերթի փոխանցմամբ՝ Իսրայելի ԱԳՆ-ը ԱՄՆ նախագահ Դոնալդ Թրամփին անվանել է Սպիտակ տանն իրական ընկեր։
Իսրայելի փոխարտգործնախարար Ցիպի Հոտովելին հայտարարել է, որ Իսրայելը չափազանց գոհ է ԱՄՆ նոր վարչակարգից։ Նա այդ հայտարարությունն արել է հունվարի 22-ին Դոնալդ Թրամփի ու Իսրայելի վարչապետ Բենիամին Նեթանյահուի միջև տեղի ունեցած հեռախոսազրույցներից հետո.
«Կարծում եմ, որ Թրամփի վարչակարգի բոլոր հայտարարություններն ի ցույց են դնում Իսրայելի հանդեպ նրա բարեկամական վերաբերմունքի խորությունը։ Նրա աշխատակիցները հասկանում են Մերձավոր Արևելքում, աշխարհում տիրող իրավիճակի բարդությունը։
Իսրայելը դեմոկրատական ռեժիմով միակ երկիրն է տարածաշրջանում, և նրանք ցանկանում են պահպանել Իսրայելը»։
2016 թվականի նոյեմբերին ԱՄՆ-ում անցկացված նախագահական ընտրություններից հետո Բենիամին Նեթանյահուն հայտարարել էր, որ ԱՄՆ-ի ու Իսրայելի հարաբերությունները կհասնեն նոր բարձունքների և ԱՄՆ նորընտիր նախագահին որակել է որպես Իսրայել պետության իրական ընկեր։
