RTBF-ի փոխանցմամբ՝ Փարիզի ու Բրյուսելի ահաբեկչությունների զոհերի ազգականներն ու մերձավորները դատի են տվել Twitter սոցցանցին։ Հավաքական հայցը ներկայացվել է ԱՄՆ-ում։
Հայցվորների կարծիքով՝ սոցցանցը չի կարողացել արգելափակել իրենց գործած հանցանքների մասին ահաբեկիչների հաղորդումները, և որ Twitter-ը նրանց տվել է հաղորդակցման հզոր միջոց, ինչն էլ ահաբեկիչներին օգնել է հասնել իրենց նպատակներին։
Հայցվորները մտադիր են սոցցանցից պահանջել դրամական փոխհատուցում, որի չափը չի հաղորդվում։ Նախորդ տարվա օգոստոսին սոցցանցը հայտնել էր օգտատերերի 360.000 էջերի փակման մասին, որոնք կարող էին այս կամ այն կերպ մասնակից լինել ահաբեկչական գործունեության։
2016 թվականի մարտի 22-ին Բրյուսելի օդանավակայանում ու մետրոպոլիտենում գրանցված երեք պայթյունի հետևանքով զոհվել էր 35 և վիրավորվել ավելի քան 300 մարդ։ 2015 թվականի նոյեմբերի 13-ին էլ մի շարք պայթյուններ էին հնչել Փարիզում, որոնց հետևանքով զոհվել էր 130 և վիրավորվել ավելի քան 350 մարդ։
