Աշխարհի ամենաթանկարժեք զբոսանավերից մեկը՝ Nirvana-ն 305 միլիոն դոլարով վաճառքի է հանվել: Դրան տիրանալու համար միլիարդատերերի մեջ իսկական ճակատամարտ է սկսվել:
88,5 մ երկարությամբ, 6 տախտակամածերով, 7,5 մ և 3 մ լողավազաններով անցած տարի թողարկված այս զբոսանավը Monaco Yacht Show- 2012-ի մարգարիտներից մեկն էր: Դրա ներքին հարդարումը նույնպես ցնցում է շքեղության սիրահարներին: Զբոսանավի վրա երկու լողավազաններ կան, ինչպես նաև արևային լոգանքներ ընդունելու տարածք: Նավի դիմային մասում է տեղակայված սրահը, որտեղ բար, ռեստորան և տերարիում կա:
Ապագա սեփականատիրոջ սենյակները վերին տախտակամածի վրա են գտնվում: Դրան է միանում արևային լոգանք ընդունելու գոտին, որտեղ նաև ջակուզի, ծովին՝ նաև դիտահարթակ և փակ ռեստորան կան: Բոլոր տախտակամածներն իրար է միացնում արծաթափայլ վերելակը: Հյուրերը կարող են հանգստանալ սպա սրահում, այցելել ֆիթնես դահլիճը, իսկ կինոյի սիրահարների համար գործում է 3D-կինթատրոնը: Հատուկ տեղ է նախատեսված նաև մոտորանավակների և ակվաբայքերի համար, իսկ եթե հյուրերը կհոգնեն երկարատև ծովային ճանապարհորդությունից, նրանք կարող են զբոսանավը լքել սեփական ուղղաթիռներով, որոնց համար զբոսանավի վրա ուղղաթիռների հարթակ է նախատեսված:
Nirvana-ն ընդամենը 6 սենյակ ունի, որտեղ կարող է 12 մարդ տեղավորվել: Զբոսանավի մարքեթինգով զբաղվող ընկերությունը հայտարարել է, որ ամեն սանտիմետրի վրա դիզայներական և մոդելավորման մանրակրկիտ աշխատանքներ են տարվել: Դիտելով Nirvana-ի լուսանկարները՝ դրան շատ հեշտ է հավատալ:
