Վերջին շրջանի միտումը վկայում է, որ միլիարդատերերը մուտք են գործում տպագիր պարբերականների շուկա, որը, ինչպես հայտնի է, գտնվում է հատակում: Հարուստները կարող են իրենց թույլ տալ թանկարժեք քմահաճություններ, ինչպիսիք, օրինակ, Washington Post-ը կամ New York Times-ը գնելն է, որոնք Միացյալ Նահանգների ամենաազդեցիկ թերթերն են՝ նշում է Arnold Aerial Advertising գովազդային ընկերության նախագահ Մայքլ Առնոլդը:
Ամերիկյան լրագրության առաջատար Washington Post-ը գնելը աշխարհում խոշորագույն Amazon.com օնլայն ռիթեյլերի հիմնադիր Ջեֆ Բեզոսի կողմից նշանավորեց հենց այդ միտումը:
Գրեթե միաժամանակ ամերիկյան պարբերականներից նշանավոր Boston Globe թերթը անցավ նոր տիրոջ ձեռքը՝ այն գնեց Boston Red Sox բեյսբոլային ակումբի սեփականատեր Ջոն Հենրին:
Իսկ աշխարհի ամենահարուստ մարդկանցից Ուորեն Բաֆեթը մի քանի տարում ԱՄՆ-ի տարբեր քաղաքներում գնեց արդեն 30 մանր թերթեր, իր իսկ խոսքով՝ «ոչ թանկ գնով»:
Առևտրային տեսանկյունից Washington Post-ը գնելը կարելի է համարել տապալված գործարք՝ կարծում է բիզնես հանրությունը. Բեզոսը Washington Post-ը ձեռք էր բերել 250 մլն դոլարով: Washington Post-ի վնասը ընթացիկ տարվա 1-ին եռամսյակում կազմել է 15 մլն դոլար, իսկ Business Insider պարբերականը կանխատեսում է, որ դրանք կհասնեն 60 մլն դոլարի:
