Քաղաքական տարբեր ուժեր խոսում են դաշինքեր կազմելու մասին: «Բարգավաճ Հայաստան» և «Համախմբում» կուսակցությունների միջև ևս հանդիպում է տեղի ունեցել և քննարկվել է նաև այդ հարցը: «Համախմբում» կուսակցության համանախագահ Էլինար Վարդանյանը «Առաջին լրատվական»- ի հետ զրույցում անդրադառնալով հարցին, թե հնարավո՞ր է դաշինքներով ընտրությունների արդյունքների վրա ազդել, նշեց, որ այս ընտրական համակարգը այլ բան չի թողնում, քան փորձել դաշինքների միջոցով ձևավորել լուրջ բևեռ:
«Այո՛, իմ գնահատմամբ, այս ընտրություններին, բազմաթիվ կուսակցություններ, ովքեր նպատակ ունեն մասնակցել ընտրություններին, պետք է ձգտեն դաշինքներ կազմել: Թե ինչպիսի դաշինքներ կլինեն, նախապես կանխատեսումներ անել հնարավոր չէ, բայց եթե իրականում ստեղծվի ռեալ բևեռ, որը կլինի հակակշիռ, արդյունքների վրա ազդել հնարավոր կլինի:
Թե խորհրդարան անցնելուց հետո դաշինքներն ինչպիսի ճակատագիր են ունենում, դա բոլորովին այլ թեմա է, որովհետև այս դաշինքների հիմնական նպատակը ընտրությունների արդյունքների վրա ազդելն է, և ի վերջո գոնե մեկ անգամ հնարավարություն տալ, որպեսզի ժողովրդի ազատ կամարտահայտման արդյունքում ձևավորվի խորհրդարանը: Բնականաբար դա լուրջ ազդեցություն կարող է ունենալ նաև ընտրությունների որակի վրա»,- նշեց Է. Վարդանյանը:
Նրա խոսքով՝ դաշինքներ կարող են կազմել միայն այն կուսակցությունները, որոնց գաղափարական հենքում կան ընդհանրություններ և բանակցությունների արդյունքում նպատակը ոչ միայն դաշինք կազմելն է, այլ այն միասնական պլատֆորմի ձևավորումը, որի միջոցով կուսակցությունները կգնան ընտրությունների»:
Որևէ կուսակցության հետ համագործակցումը «Համախմբում» կուսակցության փոխնախագահը չի բացառում:
Մանրամասները՝ տեսանյութում:
