ՀՀ ֆինանսների նախարարությունը՝ վարչապետի հանձնարարականով, ամփոփել է խոշոր կազմակերպությունների` 2013 թվականի հուլիսի մեկի դրությամբ պարտադիր արտաքին աուդիտի անցնելու գործընթացի արդյունքները: Այդ արդյունքները լրագրողներին ներկայացրեց ՀՀ ֆինանսների փոխնախարար Լիանա Հունանյանը:
«Խոշոր ընկերությունները 2009թ. պետք է իրենց ֆինանսական հաշվետվությունները ենթարկեին աուդիտի: Ֆինանսների նախարարությունը պարբերաբար այդ ցուցանիշները ամփոփում է և հրապարակում ամեն տարի: Այս տարվա միակ և նշանակալի փոփոխությունն այն է, որ մենք սկսել ենք նաև կիրառել: Այս տարվա հունիս ամսին կատարվեց փոփոխություն, համաձայն որի` այն ընկերությունները, որոնք դրական աուդիտորական եզրակացություն չեն ստացել, չեն կարող մասնակցել պետական գնումներին»,- նշեց Լիանա Հունանյանը:
Տվյալների համաձայն` 941 խոշոր համարվող կազմակերպություններից աուդիտի են ենթարկվել 630-ը, որից 427 կազմակերպության տրվել է դրական եզրակացություն, 203 կազմակերպություն չի ստացել դրական եզրակացություն, 311 կազմակերպությունում աուդիտ չի անցկացվել:
Հիշեցնենք, որ խոշոր են համարվում այն կազմակերպությունները, որոնց հաշվետու տարվա գործունեությունից ստացված հասույթը կամ ակտիվների հաշվեկշռային արժեքը հաշվետու տարվա վերջի դրությամբ գերազանցում է մեկ միլիարդ դրամը:
